Трамп жаҳонда нефть нархининг сўнгги йиллардаги энг катта пасайишига сабаб бўлди – ОАВ

Доналд Трампнинг глобал тариф уруши уч ярим йил ичида глобал нефть нархининг бир ойлик энг катта пасайишига олиб келди. Бу ҳақда Reuters хабар берди.

Нашрнинг қайд этишича, 30 апрель куни Brent маркали нефть фючерслари 49 центга ёки 0,8 фоизга тушиб, бир баррель учун 63,76 долларни ташкил қилган. АҚШ West Texas Intermediate хомашёси фючерслари 40 цент ёки 0,7 фоизга тушиб, бир баррель учун 60,02 долларни ташкил қилди.

Умуман олганда, апрель ойида нефтнинг иккала нави мос равишда тахминан 15 фоиз ва 16 фоизга арзонлашди. Бу 2021 йил ноябридан бери энг катта пасайишдир. Reuters агентлиги нефть нархининг пасайишини АҚШнинг 2 апрелда эълон қилинган янги тариф сиёсати билан бевосита боғлайди, унга кўра Америкага барча импортлар қўшимча бож олади. Бунга Хитой томонидан кўрилган жавоб чоралари ҳам қўшилди.

Reuters сўров ўтказган таҳлилчиларнинг башорат қилишича, Трампнинг тарифлари жорий йил бошидаёқ жаҳон иқтисодиётининг рецессияга тушиб қолиш эҳтимолини оширган. Апрель ойида Хитойдаги заводларда ишлаб чиқариш ҳажмида сўнгги 16 ой ичидаги энг тез пасайиш кузатилди.

Нефть нархини пасайтирган қўшимча омил ОПEК+ мамлакатлари томонидан қазиб олиш ҳажмининг оширилиши кутилмалари эди. Май ойида, эҳтимол, июнь ойида қазиб олиш ҳажми ошиши кутилмоқда.