Путин Украина билан Истанбул музокараларидан сўнг армиясини янги ҳужумга ташлади

Россия ва Украина ўртасида тинчлик музокараларининг бошланиши Россиянинг янги ҳужум операциясининг бошланиши билан бирга келди, деб ёзди The New York Times (NYT).

Таъкидланишича, Москва қўш ҳарбий кампанияни олиб бормоқда: об-ҳаво қуруқ бўлгач, Россия армияси ҳужумларини кучайтирган ва Украина шаҳарларига ҳам катта йирик зарбалар берилмоқда.

Баҳорги «сукунатдан» сўнг, рус қўшинлари май ойида тез суръатда олдинга силжишни бошлаган. Украинанинг OSINT DeepState лойиҳасига кўра, бу ойда рус қўшинлари кунига ўртача 14 квадрат километрни эгаллаб оляпти - апрель ойидагидан икки баравар кўп. Ҳарбий таҳлилчилар кичик муваффақиятларни қайд этмоқда, аммо бу ёзда катта ютуқлар ёки ҳал қилувчи ғалабани кутмаяпти.

Янги ҳудудларнинг аксарияти Донецк вилоятида қўлга киритилган. Россия армияси қамал остидаги Покровск ва Торецк ўртасидаги мудофаани ёриб ўтиб, шимолга - Украина Қуролли Кучларининг минтақадаги сўнгги логистика марказларига қараб силжиган. Ҳарбий таҳлилчи Дмитрий Кузнец фикрича, бу Донецк вилоятини тўлиқ эгаллаш кампаниясининг бошланиши бўлиши мумкин.

Операциялар Украина шимолида, Россия кичик муваффақиятларга эришган Суми вилояти яқинида янги фронтнинг очилиши билан бирга олиб борилмоқда. Аввалроқ Курск вилоятининг бир қисмини босиб олган Украина қўшинларини сиқиб чиқаргандан сўнг, Россия армияси аста-секин Украина ҳудудига яқинлашмоқда. Ҳарбийлар 23 майдан бошлаб Владимир Путиннинг талабларини бажармоқда: у Украина рейдларидан ҳимояланиш учун Курск ва Белгород вилоятлари чегарасида «буфер зона» яратишни талаб қилган эди.

Бутун қиш давомида Москва жиҳозларни тўплади, алоқани яхшилади ва дронларни модернизация қилди, деб ёзди NYT. Россия, шунингдек, Харков яқинида элита ҳаво-десант бўлинмаларига эга 50 минг кишилик гуруҳни тўплаган. Бундан олдин Истанбулдаги музокараларда Россия делегацияси томонидан Украинанинг яна икки вилоятини эгаллаб олиш таҳдиди янграган эди. Таҳлилчилар Россияда бутун чегара ҳудудини эгаллаш учун ресурслар борлигига шубҳа қилишади, бироқ Суми вилоятига бостириб кириш Украина Қуролли кучларини у ерга минглаб аскарларини қайта жойлаштиришга ва Донбассдаги мудофаасини заифлаштиришга аллақачон мажбур қилмоқда.

Яқинда АҚШ президенти Доналд Трамп бир ярим-икки ҳафта ичида Вашингтон Украинадаги урушни тугатиш бўйича музокаралардаги кейинги тактика ҳақида қарор қабул қилишини айтди. Унинг сўзларига кўра, бу қарор кўп жиҳатдан Россиянинг ўзини тутиши ва можарога барҳам бериш истагига боғлиқ бўлади. Германия канцлери Фридрих Мерц аллақачон Истанбулда Россия билан музокаралар муваффақиятсиз якунланганини қайд этиб, узоқ урушга тайёргарлик кўришга чақирган эди.