Kosta-Rikada Poas vulqoni harakatga keldi

Kosta-Rikadagi Poas vulqoni harakatga keldi. Vulqon otayotgan kul ustunlari balandligi 3-4 kilometrga yetmoqda, deb xabar beradi El Commersio.

Qayd etilishicha, vulqon otilishi maydoni 3250 kilometr kvadratni tashkil etadigan Markaziy vodiyning istalgan nuqtasidan ko‘ringan.

21 aprel kuni soat mahalliy vaqt bilan 15:00 holatiga ko‘ra, yaqin atrofidagi aholi punktlariga kul tushishi kuzatilmagan. Shamol yo‘nalishi sabab kul Gresiya, Sarchi va San-Karlos kantonlari tomon harakatlanishi mumkin. Poas atrofidagi hududlar va Toro-Amarilo okrugida xavfning «sariq» darajasi e’lon qilingan.

Vulqon harakatga kelishidan oldin zilzila kuzatilmagan, biroq atrofdagi hududlarda oltingugurt hidi tarqalgan. Tabiiy ofat Xuan Santamariya nomidagi xalqaro aeroport faoliyatiga ta’sir ko‘rsatmagan.

Poas vulqoni dengiz sathidan 2708 metr balandlikda joylashgan bo‘lib, uning cho‘qqisida diametri 1,5 kilometrga yetadigan ikkita krater mavjud.

Avvalroq Filippindagi Negros orolida Kanlaon vulqoni harakatga kelgani, hududda uchinchi xavf darajasi e’lon qilingani to‘g‘risida xabar berilgandi.