Зеленский Путин таклиф қилган 3 кунлик сулҳни рад этиб, 30 кунлик оташкесимга чақирди

Украина президенти Владимир Зеленский Россия президенти Владимир Путиннинг 8-11 май кунлари вақтинчалик ўт очишни тўхтатиш ҳақидаги таклифини рад этди. Унинг сўзларига кўра, Киев 7 майдан бошлаб ўт очишни тўхтатиш режимига 3 эмас, балки 30 кунга тайёр, деб хабар берди BBC.

«Бу катта саҳна спектакли», деди Зеленский Кремль ташаббусини изоҳлар экан.

Унинг таъкидлашича, Украина 9 май куни бўлиб ўтадиган парадда Путинга «худди изоляциядан чиқиб қолгандек иллюзияни яратишда» ёрдам бермоқчи эмас.

«9 май куни Путинга худди изоляциядан чиққандек таассурот қолдириши учун ҳеч ким ёрдам бермайди», деб қўшимча қилди Зеленский.

Украина раҳбари, шунингдек, Киев Ғалабанинг 80 йиллигини нишонлаш учун Москвага ташриф буюришга қарор қилган хорижий давлат раҳбарларининг хавфсизлигини кафолатлай олмаслигини таъкидлади. Унинг сўзларига кўра, хавфсизликни таъминлаш Россия томонининг зиммасида.

Аввалроқ, 28 апрель куни Путин 8 майга ўтар кечасидан 11 майга ўтар кечасигача ҳарбий ҳаракатларни тўхтатиш режасини маълум қилган эди. Бунга жавобан Украина томони ўт очишни зудлик билан тўхтатишни таклиф қилди.