АҚШ DeepSeek сунъий интеллект чатботини Хитой армиясига ёрдам беришда айблади

Сунъий интеллект соҳасидаги ишланмаларга ихтисослашган DeepSeek компанияси Хитой ҳарбийлари ва разведка хизматларига ёрдам беради. Бу ҳақда америкалик юқори мартабали амалдорга таяниб, Reuters хабар берди.

Унинг сўзларига кўра, Хитой стартапи Жануби-Шарқий Осиё давлатларидаги сохта компаниялардан фойдаланган ҳолда Хитойга етказиб бериш тақиқланган янги яримўтказгичларни қўлга киритишга уринган. 

DeepSeek, хусусан, фойдаланувчиларга оид маълумотлар ва статистикани давлат органлари билан бўлишишда ҳам айбланмоқда.

Хитойда фаолият юритадиган компаниялар Пекин сўровига жавобан барча маълумотларни тақдим этишга мажбур. DeepSeek ўзининг махфийлик сиёсати тўғрисидаги саволларга жавоб қайтармаган.

Reuters суҳбатдошининг сўзларига кўра, DeepSeek Хитой Қуролли кучлари ва мамлакат мудофаа саноати мажмуаларига боғлиқ бошқа ташкилотларнинг харидларига алоқадор ҳужжатларида 150 мартадан ортиқ тилга олинган. Унинг айтишича, компания Хитой армияси тадқиқот институтларига хизмат кўрсатган.

Америкалик амалдор, шунингдек, DeepSeek Nvidia’нинг кўплаб H100 микрочипларига эгалик қилишини таъкидлаган. 2022 йилдан бери ушбу чипларни етказиб бериш АҚШ экспорт чекловлари остида.

Nvidia’нинг энг замонавит чипларини ХХРга лицензиясиз олиб кириш Америка экспорт қоидаларини бузсада, Хитой компанияларига мамлакатнинг маълумотларни қайта ишлаш марказларида ушбу чиплардан масофадан туриб фойдаланишга рухсат этилган.

DeepSeek компанияси январ ойида DeepSeek-V3 номли янги сунъий интеллект тизимини тақдим этганди. Компания вакилларининг қайд этишича, модел икки ой давомида такомиллаштирилган ва унга 6 миллион доллардан камроқ маблағ сарфланган — Америка компаниялари эса бу каби йўналишларга ўнлаб баробар кўп харажат қилмоқда.