Владивостокнинг 12 йилга қамалган собиқ мэри Украинадаги урушга жўнаб кетди

Порахўрликда айбланиб, 12 йилга қамалган Владивостокнинг собиқ мэри Олег Гуменюк колонияда Россия мудофаа вазирлиги билан шартнома тузиб, Украинадаги урушга жўнаб кетган. Бу ҳақда 14 январ, якшанба куни собиқ мэрнинг адвокати Александр Китаевга асосланиб, «Коммерсант» газетаси хабар берди.

Унинг сўзларига кўра, Гуменюк 22 декабр куни ҳарбий қисмга етиб бориши керак бўлган буйруқ олган. Адвокатнинг айтишича, у собиқ амалдор ҳозир қаерда эканлиги ҳақида маълумотга эга эмас, аммо Китаевга кўра, Гуменюк «полигонлардан бирида тайёргарликдан ўтиши керак». Шу билан бирга, Приморе ОАВда Гуменюкнинг ҳарбий формада бошқа ҳарбий хизматчилар билан бирга қўлида қурол ушлаб тургани акс этган фотосурат пайдо бўлди.

Ноябрда Гуменюк авиарейсдан туширилиб, колонияга қайтарилди 

Ўтган йилнинг охирида Россия ОАВ ва ижтимоий тармоқларда Олег Гуменюк мудофаа вазирлиги билан Украинадаги урушда қатнашиш учун шартнома имзолагани, бироқ у авиарейсдан туширилиб, колонияга қайтгани ҳақида маълумот пайдо бўлган эди. 

Гуменюк 2019 йилнинг апрелидан 2021 йилнинг майигача Владивосток мэри лавозимида ишлаган. 2023 йил январида у 38 миллион рубл миқдоридаги порахўрликда айбдор деб топилиб, 16 ярим йилга қаттиқ тартибли колонияга ва 150 миллион рубл миқдорида жаримага ҳукм қилинди. Апелляциядан кейин муддат 12 йилга қисқартирилди. Гуменюк ўз айбини тан олмади.