Коррупция учун судланган Владивосток собиқ мэри урушга боради

Владивостокнинг ҳисоб бўйича иккинчи собиқ мэри порахўрликда айбланганди, у Мудофаа вазирлиги билан шартнома имзолаган ва Украинада жанг қилмоқчи. 2023 йил охирида Олег Гуменюк колониядан урушга жўнаб кетганди, энди эса Игор Пушкарев ҳам унинг ортидан йўл олади.

Игор Пушкарев Фото: Григорий Сысоев / РИА Новости

2019 йилда коррупцияда айбланиб 15 йилга қамалган Владивостокнинг собиқ мэри Игор Пушкарев Россия Мудофаа вазирлиги билан Украинадаги урушда қатнашиш бўйича шартнома имзолади. Бу ҳақда 20 октябр, якшанба куни PrimaMedia ва «Коммерсант» нашрлари хабар берди.

Бу ҳақда ижтимоий тармоқларда тарқатилган маълумотни Пушкаревнинг адвокати Руслан Омелченко «Коммерсант»га тасдиқлади.

Игор Пушкарев 2008-2017 йилларда Владивосток мэри бўлган. 2019 йилда суд уни жуда катта миқдордаги пора (50 миллион рубл), тижорат порахўрлиги ва мансаб ваколатини суиистеъмол қилишда айбдор деб топди. У 15 йилга қаттиқ тартибли колонияга ҳукм қилинди ва 500 миллион рубл миқдорида жаримага тортилди. 2022 йилда суд Пушкаревни мансаб ваколатини суиистеъмол қилиш бўйича иккинчи жиноий ишда айбдор деб топди. Унинг жазо муддати уч ойга оширилди.

Пушкарев — Владивостокнинг Украинага урушга йўл олаётган иккинчи судланган собиқ мэри. 2023 йил декабрида 2019 йил апрелидан 2021 йил майигача шаҳар ҳокими бўлган ва порахўрлик иши бўйича 12 йилга қамалган Олег Гуменюк ҳам урушга жўнаб кетганди.

#Владивосток #Игор Пушкарев