Tramp saraton kasalligi aniqlangan Baydenni qo‘llab-quvvatladi

AQSh prezidenti Donald Tramp o‘zi va rafiqasi Melaniya nomidan 18 may, yakshanba oqshomida Amerika davlati rahbari lavozimidagi o‘zidan oldingi prezident, agressiv shaklda prostata saratoni tashxisi qo‘yilgan Jo Baydenni qo‘llab-quvvatlashini bildirdi.

«Melaniya va men Jo Baydenga yaqinda qo‘yilgan tibbiy tashxisdan xafamiz. Biz Jill va uning oilasiga eng samimiy va ezgu tilaklarimizni yo‘llaymiz, Joga esa tez va muvaffaqiyatli tuzalib ketishini tilaymiz», deb yozdi Oq uyning amaldagi rahbari o‘zining Truth Social ijtimoiy tarmog‘ida.

O‘z navbatida, AQShning sobiq prezidenti Barak Obama Bayden saratonga qarshi «qat’iyat» bilan kurashishiga ishonch bildirdi. «Mishel va men butun Bayden oilasi bilan birdammiz. Saratonning barcha ko‘rinishlarida ilg‘or davolash usullarini topish uchun hech kim Jodan ko‘ra ko‘proq ish qilgani yo‘q va ishonchim komilki, u o‘zining qat’iyatliligi bilan bu qiyinchilikka qarshi kurashadi. Biz uning tez va to‘liq sog‘ayib ketishini tilaymiz», deb yozdi u X ijtimoiy tarmog‘ida.

AQSh sobiq vitse-prezidenti va 2024 yilgi prezidentlik sayloviga Demokratik partiyadan nomzod Kamala Xarris o‘zining X mikroblogida shunday yozdi: «Jo — kurashchi. Bilaman, u bu qiyinchilikka o‘zining hayoti va yetakchiligini har doim belgilab bergan kuch, chidamlilik va optimizm bilan qat’iy turadi. Biz to‘liq va tez tuzalib ketishiga umid qilamiz».