Moskva va Vashington Rossiya gazini Yevropaga yetkazib berishni tiklash variantini muhokama qilmoqda

Vashington va Moskva vakillari Rossiya gazini Yevropaga yetkazishni tiklash imkoniyati bo‘yicha muzokaralar o‘tkazdi. Bu haqda Reuters o‘z manbalariga tayanib xabar berdi.

Agentlik suhbatdoshlarining so‘zlariga ko‘ra, «Moskvaning YeI gaz bozoridagi rolini tiklash RF prezidenti Vladimir Putin bilan tinchlik sulhini mustahkamlashga xizmat qilishi mumkin». Gaz yetkazib berishni tiklashda AQShning ishtiroki Rossiyaga Yevropada «siyosiy qarshiliklarni» yengishga, Vashingtonga esa ta’minot hajmini nazorat qilish imkoniyatini berishi mumkin.

Donald Trampning maxsus vakili Stiv Uitkoff va RF prezidentining xorij davlatlari bilan investitsiya-iqtisodiy hamkorlik bo‘yicha maxsus vakili Kirill Dmitriyev Rossiya—Ukraina urushini to‘xtatish bo‘yicha muzokaralar davomida gaz yetkazib berish masalasini ham muhokama qilgan.

Muzokaralar davomida Moskva va Vashington vakillari tomonidan AQShdagi investorlarning «Shimoliy oqim» yoki «Gazprom» bilan bog‘liq loyihalardagi ishtiroki ham muhokama qilingan. Variantlardan biri sifatida Rossiya gazini Amerika kompaniyasi sotib olishi, keyin esa uni Yevropaga import qilish imkoniyati ko‘rib chiqilmoqda.

Manbalarning ta’kidlashicha, «Yevropaga gaz yetkazib berishni tiklashga urinayotgan» «Gazprom» Germaniyadagi mijozlariga ikki yillik shartnoma va sezilarli darajada chegirmalar taklif qilishi mumkin. Rossiya kompaniyasida odatda xaridorlar bilan o‘nlab yillik shartnomalar tuzadi.

Urush boshlangunga qadar Yevropa Ittifoqiga yetkazib beriladigan gazning qariyb 40 foizi Rossiya hisobiga to‘g‘ri kelgan, eng yirik importchi esa Germaniya bo‘lgan. 2024 yilda ushbu ulush 10 foizni tashkil etdi, 2025 yil yanvarda Ukraina Rossiya gazi tranzitini to‘xtatib qo‘yganidan keyin yana ikki barobarga qisqarib ketdi.

Yanvar oyida Financial Times Yevropa Ittifoqidagi amaldorlar YeI davlatlari Rossiya gazini xarid qilishni tiklash imkoniyatini muhokama qilishni boshlagani haqida yozgandi. Muzokaralardan xabardor uchta manbaning aytishicha, ushbu g‘oyani Germaniya va Vengriyadagi ayrim amaldorlar ma’qullagan.