AQSh ikki oy ichida Suriyadagi qo‘shinlarini bosqichma-bosqich olib chiqishni boshlaydi

AQSh Isroilni ikki oy ichida Suriyadagi qo‘shinlarini bosqichma-bosqich olib chiqishni rejalashtirayotgani haqida xabardor qildi, deb yozmoqda Ynet.

Qayd etilishicha, Isroil bunday voqealar rivojining oldini olishga harakat qilgan, biroq AQSh bu urinishlar samarasiz bo‘lganini ochiq aytgan. Shu bilan birga, Isroil mudofaa idoralari vakillari Vashington o‘z qarorini qayta ko‘rib chiqishi uchun harakat qilishni davom etmoqda.

Yuqori martabali amaldorlardan birining jurnalistlarga ma’lum qilishicha, gap AQShning Suriyadagi qo‘shinlarini qisman olib chiqish haqida ketayotgan bo‘lish mumkin. Uning so‘zlariga ko‘ra, Isroil Amerika kontingentining Suriyani tark etishi, Turkiyani mintaqadagi o‘z ta’sirini kengaytirishiga undashidan xavotirda.

AQSh Mudofaa vazirligi Suriyadagi Amerika qo‘shinlarini to‘liq olib chiqib ketish rejasini tayyorlayotgani to‘g‘risida NBC News telekanali fevral boshlarida xabar bergandi. Pentagonning 2024 yil dekabr oyidagi ma’lumotlariga ko‘ra, Suriyada 2 mingga yaqin amerikalik harbiy mavjud.

AQShning Suriyadagi asosiy missiyasi — IShIDga qarshi turish va Vashingtonning mahalliy ittifoqchilarini, jumladan, Suriya demokratik kuchlarini qo‘llab-quvvatlash edi.