Хивадаги Дишан қалъа қайта тикланади

Хивадаги Дишан қалъа Ичан қалъага ўхшаш туристик объектга айлантирилади. Унинг вайрон бўлган девори тикланиб, яшил ҳудуд ва дам олиш маскани сифатида халққа қайтарилади, дея маълум қилди Ўзбекистон Экология, атроф-муҳитни муҳофаза қилиш ва иқлим ўзгариши вазирлиги.

1842 йилда Хива хони Оллоқулихон буйруғи билан барпо қилинган Дишан қалъа (ташқи қалъа) бугунги кунда жуда хароб аҳволга келиб қолган. Узунлиги 6200 метр бўлган деворнинг 2000 метр қисми бутунлай вайрон бўлган, 2500 метр қисми эса яроқсиз ҳолга келган. Бундан ташқари, девор атрофида узоқ йиллар мобайнида бир қанча ноқонуний қурилишлар амалга оширилган. Оқибатда Дишан қалъа девори атрофида юриш учун умуман майдон қолмаган, дейилади вазирлик хабарида.

Дишан қалъани сақлаб қолиш мақсадида Хива шаҳрининг «Шихлар» маҳалласидаги 55 та турар ва нотурар объектларни бошқа ҳудудларга кўчириш белгиланган. Уларнинг ўрнида эса «яшил майдонлар» ва «яшил боғлар» барпо қилиш, дарахт экиш, ободонлаштириш ва кўкаламзорлаштириш ишларини олиб бориш кўзда тутилган.

Қолаверса, қалъа девори миллий андозалар асосида қайта тикланиб, эски ҳолатига қайтарилади ва атрофида 1,5-2 метр ҳудудда йўлаклар очилади. Шунингдек, ушбу ҳудудга туташ бўлган «Шихлар» ва «Ангарик» маҳаллаларида замонавий сайёҳлик мажмуаси ҳам барпо этилади.

Маълумот учун, Ичан қалъа — Ўзбекистоннинг энг диққатга сазовор масканларидан бири ҳисобланади. Мажмуада сайёҳларни ўзига жалб қиладиган 58 маданий мерос объекти ва археологик ёдгорликлар, 30 га яқин экспозиция, 56 670 тарихий экспонат ва ашёлар, 174 та ҳунармандчилик дўкони мавжуд.

2024 йилда Ичан қалъага 1 млн нафарга яқин хорижий ва 3,5 млн нафарга яқин маҳаллий сайёҳлар ташриф буюрган. 2025 йил якунига қадар эса 2 млн нафар хорижий ва деярли 5 млн нафар маҳаллий сайёҳ ташриф буюриши кутилмоқда.