Хитой космик станциясидан номаълум микроб штамми топилди

Ушбу микроб космоснинг экстремал шароитларига мослаша олади. Ундан қишлоқ хўжалиги ва тиббиётда фойдаланиш мумкин.

Фото: China Manned Space Agency

Хитойга тегишли «Тянгун» космик станциясидан Ерда учрайдиган бактериянинг янги штамми — Niallia tiangongensis топилди. Бактерия номуналари 2023 йилнинг майида тўпланган.

Қайд этилишича, янги штамм космик станция каютасидан топилган бўлиб, улар стерил салфеткаларга йиғилган, музлатилган ва Ерга олиб келинган. Ердан ташқарида микробларнинг хатти-ҳаракатларини ўрганиш космонавтларнинг соғлиғини ҳимоя қилиш ва космик кема тизимларини сақлаш учун жуда муҳим.

Олимларнинг таъкидлашича, Niallia tiangongensis космоснинг экстремал шароитларига мослаша олади. У Ердаги шаклига қараганда радиация сабабли юзага келган шикастланишларни яхшироқ тиклайди ва ҳужайра ҳамда тўқималарнинг фаолиятини бузувчи номутаносиблик — оксидловчи стрессга қарши курашади.

Штаммнинг коинотда қандай омон қолишига оид маълумотлар микробларни нафақат Ер орбитасидан ташқарида, балки қишлоқ хўжалиги, тиббиёт ва бошқа соҳаларда ҳам назорат қилиш стратегияларини ишлаб чиқишда ёрдам бериши мумкин. Бактериянинг маълум органик бирикмаларни парчалаш қобилияти олимларга чиқиндиларни қайта ишлаш соҳасида янги имкониятлар очади.

#Хитой #штамм