“Таъминотчи ҳамкорликни тўхтатгани учун” – Булунғурдаги боғчада болаларга 2 кун гўштсиз овқат берилганига изоҳ берилди

Kun.uz'да Самарқанд вилояти Булунғур туманидаги 11-боғчада болалар 2 кун гўштсиз таомланганига оид хабар эълон қилинганди. Ҳолат юзасидан Мактабгача ва мактаб таълими вазирлигининг вилоят бошқармаси расмий изоҳ берди.

Унга кўра, ўрганишлар давомида боғчага апрел ойидан мол гўшти етказиб бериб келган таъминотчи “Табассум Иқбол таъминот” МЧЖ 1 май санасидан ҳамкорликни тўхтатган.

Қайд этилишича, 1 май куни куни боғчада мавжуд бўлган (қолдиқ гўштлар) 3,2 кг мол ва 12 кг товуқ гўштидан таомларда фойдаланилган ва шу куни боғчага келган 193 нафар болага берилган.

“Гўшт маҳсулоти таъминотчи корхона томонидан етказиб берилмаётганлиги тўғрисида 11-сон ДМТТ директори, ҳамшираси, омбор мудири томонидан туман мактабгача ва мактаб таълими бўлимига ёзма билдирги берилмаганлиги учун жорий йилнинг 2- ва 5 май кунлари 193 нафар тарбияланувчиларнинг 1- ва 2-таомларга гўшт маҳсулоти солинмасдан тайёрланган. Мазкур ҳолат юзасидан муассаса масъулларига интизомий чоралар кўриш белгиланди”, – дейилади муносабатда.

Қўшимча қилинишича, ҳолат аниқлангандан кейин 5 май куни “Нурли йўл Лайло маркет” хусусий корхонаси томонидан боғчага кеч соат 19:00 да гўшт маҳсулоти етказиб берилган. 6 май куни болаларга гўштли таомлар тайёрланган.