Украинада урушдан кейин сайловлар ўтказиш бўйича махсус қонун лойиҳаси тайёрланмоқда

Олий рада одамлар «сайловда ўзларининг асосий конституциявий ҳуқуқларини амалга ошира олишлари» учун «турли базавий сценарийларни» тайёрлаётгани маълум бўлди.

Фото: Getty images

Украина Олий радаси урушдан кейин сайловлар ўтказиш бўйича махсус қонун лойиҳасини тайёрламоқда. Бу ҳақда парламент спикери Руслан Стефанчук маълум қилди.

«Биз ушбу қонун лойиҳасини ишлаб чиқяпмиз, ахир кейинги сайловларни ўтказиш учун янги махсус қонун лойиҳаси зарур — у урушдан кейинги сайловларни тартибга солади», — дейди Стефанчук.

Унинг қўшимча қилишича, Украинада уруш тугаганидан кейин кўплаб чақириқлар кутилмоқда ва парламент одамлар «сайловда ўзларининг асосий конституциявий ҳуқуқларини амалга ошира олишлари» учун «турли базавий сценарийларни» тайёрлаяпти. «Ва бу Украинада бўлиб ўтиши керак. Биз бу борадаги тўғри қонунчилик муросасини топишга муваффақ бўламиз деб ўйлаяпман», — дейди Стефанчук.

Украинада президентлик сайловлари 2024 йилнинг мартида бўлиб ўтиши керак эди, аммо ҳарбий ҳолат туфайли у бекор қилинган. Доналд Трамп АҚШ президенти этиб сайланганидан кейин Оқ уй Украинада сайловлар ўтказилишини талаб қила бошлади. Кремл эса бир неча бор Володимир Зеленскийни «нолегитим» президент деб атади. 2025 йил майда Трампнинг махсус вакили Стив Уиткофф Украина ҳукумати президентлик сайловларини ўтказишга рози бўлганини маълум қилганди, бироқ у сайловлар қачон бўлиб ўтишига аниқлик киритмаган эди.

#Украина #президентлик сайловлари