Eron HAMASning Isroilga hujumida qatnashganini rad etdi

Eronning BMTdagi delegatsiyasi Tehron HAMASning Isroilga hujumini rejalashtirish yoki amalga oshirishga aloqadorligini rad etdi. Bu haqda 9 oktyabr, dushanba kuni Reuters agentligi xabar bermoqda.

«Biz Falastinni qat’iy qo‘llab-quvvatlaymiz, lekin Falastinning javobiga aloqador emasmiz, chunki bu qaror faqat Falastinning o‘zi tomonidan qabul qilinadi», dedi Eronning Nyu-Yorkdagi xalqaro tashkilotda joylashgan vakolatxonasi. Ular HAMAS hujumini «Falastinning hal qiluvchi harakati» va yetmish yillik istilo va «sionistik rejim» jinoyatlariga qarshi «qonuniy mudofaa» deb atadi. Eron rasmiylari ta’kidlashicha, HAMAS operatsiyasining muvaffaqiyati kutilmaganda sodir bo‘lgani tufayli yuzaga kelgan va bu Isroil xavfsizlik kuchlarining «eng katta muvaffaqiyatsizligiga» aylandi.

HAMASga yaqin manbaning Reuters agentligiga aytishicha, tashkilot Isroilni guruh qurolli to‘qnashuvga tayyorgarlik ko‘rilmayotgani bo‘yicha aldash uchun «ko‘p yillik kampaniya» olib borgan. 

WSJ HAMAS hujumini rejalashtirishda Eron yordami haqida aniqladi

Bir kun avval The Wall Street Journal nashri HAMAS va Livanning harbiylashtirilgan «Hizbulloh» tashkilotiga tayanib, Eron xavfsizlik xizmatlari falastinlik jangchilarga Isroilga hujum uyushtirishga yordam bergani haqida xabar qilgan edi. Guruhlar vakillariga ko‘ra, Eron 2 oktyabr kuni Bayrutda bo‘lib o‘tgan yig‘ilishda hujum uchun «yashil chiroq yoqqan». 

WSJ ma’lumotlariga ko‘ra, Eron Islom inqilobi muhofizlari korpusi zobitlari avgust oyidan beri HAMAS bilan hujum rejasi ustida ishlagan. Livan poytaxtida HAMAS va «Hizbulloh» vakillari ishtirok etgan bir necha uchrashuvlarda operatsiya tafsilotlariga oydinlik kiritilgan. 

Davlat kotibi Entoni Blinkenning aytishicha, Qo‘shma Shtatlar Tehronning Isroilga qarshi hujumga aloqadorligi haqida hech qanday dalil ko‘rmagan. «Biz Eron ushbu hujumni boshqargani yoki uning ortida turganiga oid dalillarni hali ko‘rmadik, biroq, albatta, ularning uzoq muddatli o‘zaro munosabatlari mavjud», dedi Blinken.

Tehron kecha HAMAS hujumini ma’qullab, jangchilarning harakatlari «bosib olingan hududlarda bosqinchilarga qarshi qarshilik ko‘rsatish va qurolli amaliyotlar sohasida yangi sahifa ochganini» aytdi.