Эрон ҲАМАСнинг Исроилга ҳужумида қатнашганини рад этди

Эроннинг БМТдаги делегацияси Теҳрон ҲАМАСнинг Исроилга ҳужумини режалаштириш ёки амалга оширишга алоқадорлигини рад этди. Бу ҳақда 9 октябр, душанба куни Reuters агентлиги хабар бермоқда.

«Биз Фаластинни қатъий қўллаб-қувватлаймиз, лекин Фаластиннинг жавобига алоқадор эмасмиз, чунки бу қарор фақат Фаластиннинг ўзи томонидан қабул қилинади», деди Эроннинг Ню-Йоркдаги халқаро ташкилотда жойлашган ваколатхонаси. Улар ҲАМАС ҳужумини «Фаластиннинг ҳал қилувчи ҳаракати» ва етмиш йиллик истило ва «сионистик режим» жиноятларига қарши «қонуний мудофаа» деб атади. Эрон расмийлари таъкидлашича, ҲАМАС операциясининг муваффақияти кутилмаганда содир бўлгани туфайли юзага келган ва бу Исроил хавфсизлик кучларининг «энг катта муваффақиятсизлигига» айланди.

ҲАМАСга яқин манбанинг Reuters агентлигига айтишича, ташкилот Исроилни гуруҳ қуролли тўқнашувга тайёргарлик кўрилмаётгани бўйича алдаш учун «кўп йиллик кампания» олиб борган. 

WSJ ҲАМАС ҳужумини режалаштиришда Эрон ёрдами ҳақида аниқлади

Бир кун аввал The Wall Street Journal нашри ҲАМАС ва Ливаннинг ҳарбийлаштирилган «Ҳизбуллоҳ» ташкилотига таяниб, Эрон хавфсизлик хизматлари фаластинлик жангчиларга Исроилга ҳужум уюштиришга ёрдам бергани ҳақида хабар қилган эди. Гуруҳлар вакилларига кўра, Эрон 2 октябр куни Байрутда бўлиб ўтган йиғилишда ҳужум учун «яшил чироқ ёққан». 

WSJ маълумотларига кўра, Эрон Ислом инқилоби муҳофизлари корпуси зобитлари август ойидан бери ҲАМАС билан ҳужум режаси устида ишлаган. Ливан пойтахтида ҲАМАС ва «Ҳизбуллоҳ» вакиллари иштирок этган бир неча учрашувларда операция тафсилотларига ойдинлик киритилган. 

Давлат котиби Энтони Блинкеннинг айтишича, Қўшма Штатлар Теҳроннинг Исроилга қарши ҳужумга алоқадорлиги ҳақида ҳеч қандай далил кўрмаган. «Биз Эрон ушбу ҳужумни бошқаргани ёки унинг ортида турганига оид далилларни ҳали кўрмадик, бироқ, албатта, уларнинг узоқ муддатли ўзаро муносабатлари мавжуд», деди Блинкен.

Теҳрон кеча ҲАМАС ҳужумини маъқуллаб, жангчиларнинг ҳаракатлари «босиб олинган ҳудудларда босқинчиларга қарши қаршилик кўрсатиш ва қуролли амалиётлар соҳасида янги саҳифа очганини» айтди.