Hindistonda firibgar kelin yetti oyda 25 nafar kuyovni aldadi

U har safar turmushga chiqqanidan keyin erining uyidagi qimmatbaho buyumlarni olib, qochib ketavergan.

Foto: The Economic Times

Hindistonda 23 yoshli Anuradhu Pasvan nikoh firibgarligida gumonlanib hibsga olindi. U yetti oy ichida turli shtatlarda 25 kishiga turmushga chiqqan, deb yozadi The Economic Times.

Ko‘plab firiblarga aloqador kelinni «jonli tuzoq» yordamida qo‘lga olishgan — politsiyachilardan biri yashirincha navbatdagi kuyov rolini o‘ynagan.

Dastlabki ma’lumotlarga ko‘ra, maishiy janjal tufayli eri bilan ajrashgan Pasvan boshqa shaharga ko‘chib o‘tgan va jinoiy to‘daga qo‘shilgan. U turli platformalar, masalan, WhatsAppʼdan foydalanib ish yuritadigan agentliklar orqali harakat qilgan. Bunday agentliklar erkaklarga kelin topishni va’da qiladi.

Pasvanning kelinlik hayoti quyidagicha kechgan: u navbatdagi erkakka turmushga chiqadi, to‘ydan bir necha kun o‘tib esa pullar, tillalar va elektronika buyumlarini olib, qochib ketadi.

Firibgarlik sxemasi 3 may kuni Vishnu Sharma ismli fuqaroning arizasidan keyin fosh etilgan. Pasvan unga 20 aprel kuni turmushga chiqqan va 2 may kuni erkakka tegishli qimmatbaho buyumlarni olib, uydan chiqib ketgan.

#Hindiston #kelin #firibgarlik