Испанияда блэкаут сабаб беш киши ҳалок бўлди

Қурбонларнинг уч нафари бир оиладан. Эр-хотин ва уларнинг фарзанди носоз генератордан чиққан ис гази туфайли вафот этган.

Фото: El Pais

Испанияда 28 апрел куни электр энергияси таъминоти узилиши сабаб камида беш киши ҳалок бўлди, деб хабар беради El Pais нашри.

Полиция Орансе провинциясида бир оиланинг уч аъзоси — эр-хотин ва уларнинг фарзанди ўлими бўйича тергов олиб бормоқда. Уларнинг жасади 29 апрел куни эрталаб топилган. Дастлабки версияга кўра, улар носоз генератордан чиққан ис газидан вафот этган бўлиши мумкин.

Алсира шаҳрида эса 46 ёшли аёл кислород узатиш аппарати ишламай қолиши оқибатида вафот этган.

Бундан ташқари, Мадридднинг Карабанчел туманида ёнғин оқибатида ҳалок бўлган аёлнинг жасади топилган. Ёнғин шам туфайли юзага келган бўлиши мумкинлиги тахмин қилинмоқда.

Испания ва Португалияда электр энергияси 28 апрел куни кундузи ўчди. Шундан кейин темирйўл транспорти фаолиятида узилишлар кузатилди, юзлаб авиарейслар бекор қилинди, дўконлар ва шифхоналар ўз фаолиятини тўхтатди. Блэкаутга нима сабабдан юзага келгани номаълум. 29 апрел куни Испаниянинг Red Elekctrica электр тармоқлари оператори мамлакатдаги энергия таъминотининг 99 фоизи тикланганини маълум қилди. Португалияда эса электр энергиясини етказиб бериш 28 апрел оқшомида босқичма-босқич тиклана бошлаган.

Аввалроқ Испания Ички ишлар вазирлиги блэкаут фонида мамлакатда фавқулодда ҳолат эълон қилгани тўғрисида хабар берилганди.

#Испания #блэкаут