«Владимир, тўхта» – Трамп Киевга зарбадан кейин Путинни танқид қилди

Биз ҳозиргина АҚШнинг Украинадаги урушни тугатиш бўйича ҳаракатлари ҳақида видео ёзиб бўлгандик. Студиядан чиқиб ижтимоий тармоқларни варақлашга киришганимни биламан, ҳамма ерда Доналд Трампнинг навбатдаги постига кўзим тушди. У кунига ўнлаб постлар ёзади, лекин бу галгиси бошқача.

{Yii::t(}

Ўтказиб юбориш 6s

Ўтказиб юбориш

«Vladimir, STOP»

Трамп Twitter'нинг олдинги эгалари уни блоклаганидан кейин Truth деган ижтимоий тармоқ очиб олди. Ўзи бу тармоққа асосан Трамп нима деганини кўриш учун киришса керак. Хуллас, ана шу тармоқдаги саҳифасида Трамп Россиянинг ўтган тунда Киев бўйлаб йўллаган зарбаларини танқид қилди. Ҳатто Путинни исми билан атаб, уни тўхташга чақирди.

«Россиянинг Киевга зарбаларидан хурсанд эмасман. Умуман керак бўлмаган, бемаврид иш. Владимир, ТЎХТА. Ҳар ҳафта 5 минг аскар ўляпти. Келинг, тинчлик келишуви имзолаймиз», деб ёзди Трамп.

Бу ноодатий чиқиш бўлди. Чунки Трамп президентликка келганидан кейин бирор марта очиқчасига Россияни танқид қилмаган, фақат бир марта жуда эҳтиёткорлик билан Путин урушни бошлаганини айтганди. Бироқ бу гал вазият бошқача. Трамп Путинни дунё кўз ўнгида исми билан атаб, тўхташга чақирди. Трампнинг постидан келиб чиқадики, у Киевдаги ижтимоий объектларга зарба беришни Путин буюрган деб билади.

Энг қизиғи, бир кунгина олдин Трамп музокараларда яна Россияга оғишиб гапирган, Зеленский тезроқ бир қарорга келиши керак деб уни танқид қилганди. Ҳатто Зеленский Қрим масаласида гапириб вазиятни мураккаблаштираётганини айтганди. Бир қарашда унинг барча гаплари Россия манфаатларига ишлар, ҳатто русларнинг илтимоси билан гапираётгандек эди.

Лекин ўша гапдан кейин руслар Киевни навбатдаги марта бомбалади ва Трамп энди бошқача оҳангга ўтди. Хулоса қилишга шошмаслик керак, лекин бу музокараларда жиддий ўзгариш қилиши мумкин.

Зеленский ЖАРда

Бу гаплар бўлаётган бир вақтда Украина президенти Володимир Зеленский Жанубий Африка Республикасига расмий ташриф билан борди. Африкадаги ташрифи давомида Зеленский матбуот анжуманида қатнашишга ҳам улгурди. Унинг сўзларига кўра, Лондондаги учрашув якунлари бўйича янги тинчлик келишуви тасдиқланган ва бу келишув ҳозир Доналд Трампнинг столида.

Журналистлар Зеленскийдан «Трампнинг тоқати тоқ бўлаётгани», Оқ уйдагилар Украина президенти нотўғри йўналишда эканини айтгани ҳақида ҳам сўрашди. «Бунақаси кетмайди. Агар Россия ўт очишни тўхтатишга рози бўлса, Украина бўйлаб зарбаларни тўхтатиши керак. Аслида украинларнинг тоқати тоқ бўлди, чунки бизга ҳужум қилишяпти, бошқаларга эмас», деди Зеленский.

Биз воқеалар ривожини кузатиб борамиз. Трампнинг «Vladimir, STOP» деган постига руслар қандай жавоб бериши жуда қизиқ. Биз энг муҳим воқеаларни сизга етказамиз. Kun.uzʼдан узоқлашманг.

Ўткир Жалолхонов тайёрлади.
Тасвирчи ва монтаж устаси – Жаҳонгир Алибоев.