АҚШ Эронга янги санкциялар билан таҳдид қилди

Эрон халқаро майдондаги хатти-ҳаракатларини ўзгартирмас экан, АҚШ бу мамлакат билан муносабатларда янги санкцияларни қўллашда давом этади. Бу ҳақда АҚШ президентининг миллий хавфсизлик масалалари бўйича ёрдамчиси Жон Болтон Fox News телеканали эфирида гапирди.

Унинг сўзларига кўра, АҚШ Эрон билан ядро келишувидан чиқиши ва расмий Теҳронга нисбатан санкцияларнинг янгиланиши Эронга ҳам, минтақага ҳам таъсир кўрсатади. «Бизнингча, чоралар бу давлатнинг минтақадаги бошқа давлатларга ўз иродасини ўтказишига таъсир кўрсатади. Биз ўйлаймизки, навбатдаги санкциялар (ноябрь ойида - таҳр.) бу мамлакатда ҳам иқтисодий, ҳам сиёсий оқибатларга эга бўлади. Биз шуни истаймиз. Биз Эрондаги режим жиддий ўзгаришини истаймиз», деган у.

У агар Эрон ўз сиёсатини ўзгартирмаса, мамлакатга қарши қўшимча чекловлар қўлланишини қўшимча қилган.

Эроннинг ОПЕКдаги вакили Ҳусайн Каземпур Ардебили эса расмий Теҳрон АҚШнинг саъй-ҳаракатларига қарамасдан, нефть экспорт қилишда давом этишини айтиб ўтган.

«Бозорлар ҳозирча биз учун очиқ ва биз нефть экспорт қилишда давом этамиз. Биз келгусида ҳам нефтимизни экспорт қила олишимизга ишонч билдирамиз», деган у АҚШ томонидан санкциялар яна тикланишидан кейин нима бўлиши мумкинлиги ҳақидаги саволга жавобан.

Ядровий дастур бўйича келишув
Шу йилнинг май ойида АҚШ президенти Дональд Трамп Вашингтон Эрон билан ядровий келишувдан чиққанини эълон қилганди. У бу қарорни мазкур келишув муддат якунланганидан кейин Теҳрон ядровий дастурига қайтмаслигини кафолатлай олмаслигини рўкач қилган ҳолда қабул қилган. Трамп Теҳронга қарши барча санкциялар тикланганини маълум қилганди.

Америка санкцияларининг бир қисми 7 август кунидан амалга кирди. Бу санкциялар Эрон автомобилсозлик ва металл саноатини ҳам қамраб олган. Нефть маҳсулотлари сотувини чеклаш кўзда тутилган санкциялар 5 ноябрдан кучга киради. 

«Олтилик»нинг бошқа аъзолари АҚШнинг бундай қадамига қарши чиқишди. Вашингтоннинг Европадаги ҳамкорлари Эрон билан ядровий келишувга амал қилишда давом этишмоқда.

Энергетика секторидаги санкциялар ноябрь ойида кучга киради. Вашингтон Эрондан нефть экспорти бутунлай тўхтатилишига эришмоқчи.