Elektromobillar uchun utilizatsiya yig‘imi 4 barobarga oshdi

O‘zbekistonda 1 maydan e’tiboran elektromobillar uchun utilizatsiya yig‘imi miqdorlari oshdi.

Bosh vazir 31 yanvarda imzolagan qarorga asosan, bu yig‘im miqdori:

• ishlab chiqarilganiga 3 yildan oshmagan elektromobillar uchun 4 barobarga – 30 BHM (11 mln 250 ming so‘m)dan 120 BHM (45 mln so‘m)ga;
• ishlab chiqarilganiga 3 yildan oshgan elektromobillar uchun 2,3 barobarga – 90 BHM (33 mln 750 ming so‘m)dan 210 BHM (78,75 mln so‘m)ga ko‘tarildi.

Avvalroq Kun.uz bu yangilik amaliyotda narxlarga qanday ta’sir qilishini Changan Deepal S07 misolida yoritgandi: bojxona qiymati 22 800 dollar bo‘lgan bu modelni olib kirish narxi 3600 dollardan 6200 dollargacha oshmoqda.

Ijtimoiy tarmoqlarda tarqalgan videoda BYD Song Plus Champion'ni bojxonadan olib o‘tish to‘lovlari qanday o‘zgarayotgani ko‘rsatilgan. Unga ko‘ra, 1 maydan e’tiboran bu avtomobil uchun bojxona yig‘imi – 937 ming so‘m, 12 foiz QQS – 37 mln 923 ming so‘m, utilizatsiya yig‘imi – 45 mln so‘m – jami bojxona xarajatlari 83 mln 860 ming so‘mni tashkil etadi.

Avvalroq kengaytirilgan diapazonli elektromobil (EREV) toifasiga kiruvchi (ikki xil dvigatelga ega, lekin faqat elektrda yuradigan) avtomobillar uchun alohida TIF TN kodi kiritilishi rejalashtirilayotgani ma’lum bo‘lgandi.

Bosh vazirning 31 yanvardagi qaroriga asosan, 2 oy muddatda utilizatsiya yig‘imlaridan samarali foydalanish tartibi ishlab chiqilishi belgilangan. Bu tartib ishlab chiqilgani haqida hozircha xabar berilmadi.