O‘zbekistonga avtomobil importi 3 barobarga quladi

Milliy statistika agentligi Kun.uz'ga yengil avtomobillar importiga oid ayrim raqamlarni taqdim etdi.

Ma’lum bo‘lishicha, 2025 yilning birinchi choragida O‘zbekistonga avtomobil olib kirish bir yil oldingiga qaraganda 3 barobarga kamayib ketgan.

Yanvar–mart oylari bo‘yicha so‘nggi to‘rt yillikdagi ko‘rsatkichlar quyidagicha:

• 2022 yil: umumiy qiymati 189,3 mln dollarga teng 8 508 ta;
• 2023 yil: umumiy qiymati 144,9 mln dollarga teng 10 489 ta;
• 2024 yil: umumiy qiymati 332,2 mln dollarga teng 22 210 ta;
• 2025 yil: umumiy qiymati 115,1 mln dollarga teng 6 950 ta yengil avtomobil import qilingan.

Raqamlar 2023 yildan boshlab import qilingan avtomobilning o‘rtacha narxi oshib borayotganini ko‘rsatmoqda. O‘rtacha narx 2022 yilda 22,2 ming dollar, 2023 yilda 13,8 ming dollar, 2024 yilda 15 ming dollar, 2025 yilda 16,6 ming dollar bo‘lgan.

2025 yil birinchi choragida O‘zbekiston asosan Xitoy (5 235 dona) va Koreyadan (1 425 dona), shuningdek, Hindistondan (144 dona) yengil avtomobil import qilgan. Bunda importning 75 foizi Xitoydan amalga oshirilgan.

2022 yilning mos davrida O‘zbekistonga avtomobil yetkazib beruvchilar orasida Xitoyning ulushi 53 foiz (4482 dona) edi. O‘shanda Koreyadan 2101 dona, Qozog‘istondan 1019 dona yengil mashina olib kirilgan.

Avvalroq ayrim import avtomobillar uchun ekologik sertifikat talab qilish boshlangan, lekin bir necha kun o‘tib, bu tartib to‘xtatilgandi.