Электромобиллар учун утилизация йиғими 4 баробарга ошди

Ўзбекистонда 1 майдан эътиборан электромобиллар учун утилизация йиғими миқдорлари ошди.

Бош вазир 31 январда имзолаган қарорга асосан, бу йиғим миқдори:

• ишлаб чиқарилганига 3 йилдан ошмаган электромобиллар учун 4 баробарга – 30 БҲМ (11 млн 250 минг сўм)дан 120 БҲМ (45 млн сўм)га;
• ишлаб чиқарилганига 3 йилдан ошган электромобиллар учун 2,3 баробарга – 90 БҲМ (33 млн 750 минг сўм)дан 210 БҲМ (78,75 млн сўм)га кўтарилди.

Аввалроқ Kun.uz бу янгилик амалиётда нархларга қандай таъсир қилишини Changan Deepal S07 мисолида ёритганди: божхона қиймати 22 800 доллар бўлган бу моделни олиб кириш нархи 3600 доллардан 6200 долларгача ошмоқда.

Ижтимоий тармоқларда тарқалган видеода BYD Song Plus Champion'ни божхонадан олиб ўтиш тўловлари қандай ўзгараётгани кўрсатилган. Унга кўра, 1 майдан эътиборан бу автомобил учун божхона йиғими – 937 минг сўм, 12 фоиз ҚҚС – 37 млн 923 минг сўм, утилизация йиғими – 45 млн сўм – жами божхона харажатлари 83 млн 860 минг сўмни ташкил этади.

Аввалроқ кенгайтирилган диапазонли электромобил (EREV) тоифасига кирувчи (икки хил двигателга эга, лекин фақат электрда юрадиган) автомобиллар учун алоҳида ТИФ ТН коди киритилиши режалаштирилаётгани маълум бўлганди.

Бош вазирнинг 31 январдаги қарорига асосан, 2 ой муддатда утилизация йиғимларидан самарали фойдаланиш тартиби ишлаб чиқилиши белгиланган. Бу тартиб ишлаб чиқилгани ҳақида ҳозирча хабар берилмади.