«Kalmar o‘yinlari» aktyori 1 yillik qamoq jazosiga hukm qilindi

«Kalmar o‘yinlari» serialida 001 raqamli o‘yinchi rolini o‘ynagan 80 yoshli janubiy koreyalik aktyor O Yon Su jinsiy zo‘ravonlikda ayblanib, bir yillik qamoq jazosiga hukm qilindi, deb xabar berdi The Daily Star.

Avvaliga sud hukmni 8 oylik shartli jazo bilan cheklagan bo‘lsa, keyinchalik jazo muddati oshirilgan.

Sud san’atkorni 2017 yilda hamkasbiga nisbatan ikki marta jinsiy tegajog‘lik qilganlikda aybdor deb topdi. Ayblov xulosasiga ko‘ra, aktyor uyi yonida aktrisani uning xohishiga qarshi quchoqlab o‘pgan. Aktyorning o‘zi aybini tan olmadi.

Sud jarayonida prokurorlar O Yon Su 50 yillik tajribaga ega bo‘lsa-da, «kichik hamkasbiga tegajog‘lik qilganini» ta’kidladi. Ayblov tomoniga ko‘ra, jabrlanuvchi voqea sodir bo‘lganidan keyin ham ishda, ham kundalik hayotida qo‘rquvda yashagan.

Aktyorning advokatlari ayblov faqat jabrlanuvchining so‘zlariga asoslanganini, unda aniqlik, izchillik va mantiq yo‘qligini ta’kidladi. O Yon Su sud zalida mavjud vaziyatdan afsusda ekanini bildirdi.

«Bunday yoshda sudga kelish sharmandalik. Agar biror nomaqbul gap aytgan yoki qilgan bo‘lsam, hukmni qabul qilaman. Lekin mening xatti-harakatlarimni zo‘ravonlikka tenglashtirib bo‘lmaydi. Bir lahzada 80 yil davomida qurgan hamma narsam qulab tushdi. Men o‘zimni ruhan bo‘m-bo‘sh his qilyapman. Men o‘zimga tegishli bo‘lgan joyga qaytishni xohlayman», dedi aktyor.

Aktyor hukm ustidan apellyatsiya shikoyati berdi. Apellyatsiya bo‘yicha yakuniy qaror 3 iyun kuni qabul qilinadi.