Foto: Britaniya shahzodasi tankda Rossiya chegarasi yaqiniga bordi

Shahzoda Uilyam Estoniyaga, Buyuk Britaniya armiyasining xorijiy missiyasiga tashrif buyurdi. U Boltiqbo‘yi davlatini Rossiyadan kelayotgan ehtimoliy tahdidlardan himoya qilishga qaratilgan tadbirlarida ishtirok etgan britaniyalik qo‘shinlar bilan uchrashdi, deb xabar berdi BBC.

Nashr shahzodaning harbiy kiyimda, Challenger 2 tankida, shuningdek, zirhli jangovar transport vositasida olingan suratlarini e’lon qildi. Bu suratlar Rossiya chegarasi yaqinida olingan.

«Agar qirollik xonadoni a’zolarining tashriflariga ramziy signal sifatida qaralsa, Uels shahzodasining Estoniyaga qilgan safari va Rossiya chegarasi yaqinida harbiy libosda tank minib suratga tushishi eng to‘g‘ridan to‘g‘ri signallardan biri bo‘ldi deyish mumkin», deb yozadi BBC’ning qirollik oilasi bo‘yicha muxbiri Shon Kaglen.

Estoniyaga ikki kunlik tashrifi doirasida shahzoda Uilyam mintaqada joylashgan Britaniyaning 900 nafar harbiydan iborat kontingenti, jumladan, o‘zi faxriy bosh polkovnik bo‘lgan Mersian polki askarlari bilan uchrashdi.

Uning sharafiga harbiy mashg‘ulotlar o‘tilayotgan Tapa lagerida harbiy poligon bo‘ylab ekskursiya uyushtirildi. Estoniyaning ushbu shahridagi baza – NATOning Boltiqbo‘yi mintaqasida «kollektiv xavfsizlik va mudofaa»ni ta’minlashga qo‘shgan hissasi hisoblanadigan «Kabrit» amaliyotining bir qismidir.

Yengida NATO belgisi bo‘lgan shahzodaga ushbu jangovar guruhning dala mashg‘ulotlari namoyish etilgan. Bundan tashqari, u estoniyalik va fransuz harbiy xizmatchilari bilan ham gaplashgan.

U askarlardan «Rossiya chegarasi yaqinida» xizmat qilish qanday bo‘lishi haqida so‘ragan va bu tajriba oldingi mashg‘ulotlar bilan qanchalik farq qilishiga qiziqqan.

Rossiyani tiyib turish amalda shunday ko‘rinishda – va bu baza kuchlar muvozanati qanchalik o‘zgarishi mumkinligini ko‘rsatadi. Estoniya 1991 yilda mustaqillikka erishgunga qadar bu yerda sovet havo mudofaasi bazasi joylashgan bo‘lib, u yerda MiG qiruvchi samolyotlari G‘arb bilan to‘qnashishga shay turardi.

Shundan beri barchasi o‘zgarib ketgan: endi bu hududda Rossiyaning ehtimoliy bosqiniga yo‘l qo‘ymaslik uchun Estoniya qo‘shinlari va NATO bo‘yicha ittifoqchilar joylashtirilgan.

Ushbu strategik ahamiyatga ega harbiy baza kengayishda davom etmoqda va uning muzlagan ko‘chalari NATO harbiy texnikalari bilan to‘ldirilgan.

Shahzoda Challenger 2 tankida yurishdan tashqari, Warrior piyodalar jangovar mashinasi (BMP), fransuzlarning Griffon rusumli jangovar mashinasi, baravar o‘t ochish reaktiv tizimi, Trojan muhandislik mashinasi, shuningdek, Archer mobil artilleriya qurilmasini boshqargan.

Ukrainadagi urush jangovar texnologiyalarni ham o‘zgartirmoqda, xususan 20 mart kuni shahzoda Tallinda vodorod yoqilg‘isida ishlaydigan dron bilan tanishgan.

Tapa harbiy bazasida u askarlardan zamonaviy armiyalar duch kelayotgan yangi «dronlar tahdidi» va buning uchun zarur bo‘lgan «taktikadagi o‘zgarishlar» haqida so‘ragan.

Baza atrofida «Dronlarni ko‘rganda xabar bering» degan ogohlantiruvchi belgilar bor.

Payshanba kuni Tallinda mahalliy aholi vakillari shahzodaning qo‘lini siqish yoki u bilan selfi tushish uchun sovuqda panjaralar bo‘ylab saf tortib, uni kutib turishgan. U o‘z ittifoqchilariga tobora ko‘proq umid bog‘layotgan, texnologik jihatdan rivojlangan bu kichik mamlakatda iliq kutib olindi.

Estoniya Ukrainani faol qo‘llab-quvvatlamoqda, chunki u Rossiya bilan umumiy chegaraga ega va ilgari sovetlar ittifoqi hukmronligi ostida bo‘lgan. Tallin bo‘ylab Estoniyaning ko‘k-qora-oq trikolori yonida Ukraina bayroqlari hilpirab turibdi.

Ko‘plab ukrainalik oilalar Estoniyada boshpana topgan. Shahzoda Uilyam Tallindagi ukrainalik qochqin bolalar maktabiga tashrifi chog‘ida Ukrainaning qudratiga yuqori baho berdi.

«Ukraina matonati – hamma narsada, – dedi shahzoda Uilyam o‘quvchilarga. – Sizlarning ruhingiz juda kuchli, ko‘nglingiz toza – bu juda muhim».