Kosovodagi saylovlarda bosh vazir Kurtining hukmron partiyasi g‘alaba qozondi

Kosovoda 9 fevral, yakshanba kuni parlament saylovlari bo‘lib o‘tdi. Associated Press agentligining dastlabki ovoz berish natijalariga tayanib xabar berishicha, ovozlarning 73 foizi hisoblab chiqilganidan so‘ng, bosh vazir Albin Kurtining «O‘z taqdirini o‘zi belgilash» partiyasi 42 foiz ovoz to‘plagan holda yetakchilik qilmoqda. Muxolifatdagi Kosovo Demokratik partiyasi va Kosovo Demokratik ligasi mos ravishda 22,7 va 17,9 foiz ovoz bilan ikkinchi va uchinchi o‘rinlarda. To‘rtinchi o‘rinda yana bir muxolif kuch – sobiq bosh vazir Ramush Xaradinayning «Kosovo kelajagi uchun alyansi» 7,6 foiz ovoz bilan.

«Xalq g‘alaba qozondi. «O‘z taqdirini o‘zi belgilash» g‘alaba qozondi. Biz keyingi hukumatni tuzadigan g‘olib kuchmiz», — deya Kurti so‘zlarini keltiradi AP. Ayni paytda, vazirlar mahkamasini mustaqil ravishda shakllantirish uchun hukmron partiya 50 foiz ovoz olishi kerak, aks holda «O‘z taqdirini o‘zi belgilash» Kosovoning G‘arb bilan munosabatlarini qayta ko‘rib chiqmoqchi bo‘lgan muxolifat kuchlari bilan koalitsiyaga kirishi va Serbiya bilan muzokaralarni qayta boshlashi kerak bo‘ladi.

Saylov kuni mamlakat prokuraturasi ovoz berish natijalariga ta’sir o‘tkazmoqchi bo‘lgan sakkiz kishi hibsga olingani haqida xabar berdi. Biroq keyinroq politsiya «saylov jarayoni tinch va jiddiy hodisalarsiz o‘tganini» ma’lum qildi. Ovoz berish jarayonini Yevropa Ittifoqidan 100 nafar, Yevropa Kengashidan 18 nafar, xalqaro va mahalliy tashkilotlarning 1600 nafarga yaqin vakili kuzatdi. Kosovodagi parlament saylovlarida ikki millionga yaqin saylovchi ovoz berish huquqiga ega edi. Kosovoning 120 o‘rinli parlamenti ozchilik guruhlari uchun 20 ta o‘rinni kafolatlaydi, ulardan 10 tasi, ovozdan qat’i nazar, etnik serblar uchun ajratilgan.