Ijtimoiy muhofazaga muhtoj shaxslar uchun ish o‘rinlarining eng kam soni belgilanadi

Mehnat to‘g‘risidagi qonun hujjatlariga muvofiq tashkilotlar — ish beruvchilarga ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish o‘rinlarini zaxiraga qo‘yish majburiyati yuklangan.

Belgilanishicha, aholini bandlik bilan qamrab olishni oshirishda amaliy ko‘maklashish va ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish bo‘yicha ko‘rilayotgan chora-tadbirlarning yuqori natijadorligini ta’minlash maqsadida:

• ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslar uchun ish o‘rinlarining eng kam sonini belgilash masalalari bo‘yicha tuman (shahar) hokimlari qarorlari bajarilishi ustidan nazorat qilish tuman (shahar) Kambag‘allikni qisqartirish va bandlikka ko‘maklashish bo‘limlari tomonidan amalga oshiriladi;
• kompleks ijtimoiy-iqtisodiy rivojlantirish bo‘yicha sektorlar rahbarlari prezidentning “Hududlarning jadal ijtimoiy-iqtisodiy rivojlanishini ta’minlashga doir ustuvor chora-tadbirlar to‘g‘risida”gi qaroriga muvofiq ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslar uchun ish o‘rinlarining eng kam sonini yaratish bo‘yicha tuman (shahar) hokimlari qarorlarining bajarilmaganligi uchun shaxsan javob beradi.

Qoraqalpog‘iston Respublikasi Vazirlar Kengashi raisi, viloyatlar va Toshkent shahri hokimlari:

• ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslar uchun ish o‘rinlarining eng kam sonini belgilash bo‘yicha tumanlar (shaharlar) hokimlarining qarorlarini xatlovdan o‘tkazadi;
• ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish o‘rinlarini zaxiraga qo‘yish bo‘yicha manzilli dasturlarni tasdiqlaydi;
• har yili navbatdagi kalendar yil boshlanishidan kamida ikki oy oldin tumanlar (shaharlar) hokimlarining qarorlari bilan zaxiraga qo‘yilishi kerak bo‘lgan ish o‘rinlari soni ish beruvchilarga o‘z vaqtida yetkazilishini ta’minlaydi.

Kambag‘allikni qisqartirish va bandlik vazirligi ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirishni ta’minlash yuzasidan ko‘rilayotgan chora-tadbirlar bajarilishi ustidan nazoratni kuchaytiradi.