Kolumbiya Jazoirni Haaga sudida Isroilga qarshi ish ochish rejasida qo‘llab-quvvatladi

6 noyabr kuni Jazoir prezidenti dunyoning barcha «erkin odamlari»ni va xalqaro inson huquqlari tashkilotlarini Isroilga qarshi Haaga sudida ish ochishga chaqirdi.

Foto: AP

Kolumbiya prezidenti Gustavo Petro Jazoir prezidenti Abdelmajid Tebbunning Xalqaro jinoiy sud (XJS)da Isroilga qarshi ish qo‘zg‘atish tashabbusini qo‘llab-quvvatlashga va’da berdi.

«Kolumbiya Respublikasi Jazoir Respublikasining Benyamin Netanyahuga Falastin xalqiga qarshi bolalar va tinch aholini qirg‘in qilganlik va urush jinoyatlarini sodir etganlik uchun Xalqaro jinoiy sudda ish qo‘zg‘atish chaqirig‘iga hissa qo‘shmoqchi», deya ma’lum qildi Petro X ijtimoiy mediaplatformasidagi akkauntida.

Prezident Petroning aytishicha, Kolumbiya tashqi ishlar vaziri Alvaro Leyva ertaga XJS bosh prokurori Karim Xon bilan uchrashadi.

Kolumbiya Tashqi ishlar vazirligidan berilgan bayonotga ko‘ra, Isroilning G‘azo sektorida davom etayotgan hujumlari munosabati bilan Kolumbiya prezidenti Petro nomidan maslahatlashish uchun mamlakatga chaqirilgan Kolumbiyaning Tel-Avivdagi elchisi Manxarres Errera mamlakat poytaxti Bogotaga yetib keldi.

Jazoir prezidenti Tebbun 6 noyabr kuni qilgan bayonotida dunyoning barcha «erkin odamlari» va xalqaro inson huquqlari tashkilotlarini Isroilga qarshi XJSda ish qo‘zg‘atishga chaqirdi.

#Jazoir #Kolumbiya