БААдаги ўзбекистонликлар миллий жамоа ўйинига чипта харид қилишда муаммоларга дуч келишяпти

Жорий йил 5 июн куни футбол бўйича Ўзбекистон миллий жамоаси ЖЧ-2026 саралаши 3-босқичи доирасида Бирлашган Араб Амирликлари жамоаси билан ўйнайди. Учрашув Абу-Дабидаги “Ал-Наҳян” стадионида бўлиб ўтади. 

Айни вақтда Ўзбекистон терма жамоаси ўрин олган А гуруҳида Эрон терма жамоаси етакчилик қилмоқда ва улар жаҳон чемпионати йўлланмасини ҳал қилиб бўлди. Ўзбекистон терма жамоаси йўлланмани кафолатлаши учун БАА билан сафарда камида дуранг ўйнаши ёки Тошкентда Қатарни мағлуб этиши лозим бўлади. Шунда терма жамоа рақибларининг ўйинларидаги натижадан қатъи назар мундиалга боради. Ўз навбатида БАА ўз майдонида Ўзбекистонни мағлуб эта олмаса, тўғридан тўғри йўлланмадан қуруқ қолади.

Шу жиҳатдан, БАА–Ўзбекистон ўйинининг аҳамияти юқори даражага кўтарилди. Ўзбекистондан Абу-Дабига минглаб мухлислар ташриф буюриб, миллий жамоани стадиондан туриб қўллаб-қувватлаши кутиляпти. Ушбу ҳолат фонида чипта билан боғлиқ муаммоли жиҳатлар юзага келди.

Вазият қандай?

Абу-Даби шаҳрида ўтказиладиган беллашув учун чипталар бир неча кун олдин Ticketmaster.ae сайти орқали сотувга чиқарилди. ОФК регламентига мувофиқ меҳмонлар учун стадион сиғимининг саккиз фоизига тенг сондаги чипталар тақдим этилади. “Ал-Наҳян” ўйингоҳи ўзига 15 минг мухлисни сиғдира олади. Ўзбекистон терма жамоаси мухлислари учун 1200 ўринга эга 3 та махсус жой ажратилган — 24, 25 ва 26-блок. Айни пайтда бу секторлардаги ҳамма чипталар сотиб бўлинган ёки ҳали сотувга чиқарилмаган. Қолган секторлар эса деярли ҳали сотилмаган, стандарт нарх – 20 дирҳам (70 минг сўм).

Агар ўзбекистонлик ёки бошқа хориж фуқароси мезбон секторлардан чипта харид қилса, стадионга кириш учун БАА резидент ID картаси керак бўлади. Шундан келиб чиқиб, БАА ID картасига эга ўзбекистонликлар ўйинга чипта харид қилишган. Аммо бир неча кундан кейин уларнинг электрон почтасига чипта бекор қилингани ва харид учун сарфланган пул 5-10 иш кунида қайтарилиши ҳақида хабар келган. Бу эса норозиликларга сабаб бўляпти.

Халқаро тартиб қандай?

ФИФА қоидаларига кўра, мезбон давлат рақиб жамоа мухлислари учун стадион сиғимининг 5–10 фоизгача қисмини ажратиши лозим. Бу жойлар одатда хавфсизликни таъминлаш мақсадида “меҳмон секторлари” сифатида белгиланади. Яъни БАА минимал билет квоталари талабини бажарган.

Аммо резидент бўлишига қарамасдан, миллати ёки фуқаролиги асосида билет олишни чеклаш нормал ҳолат сифатида баҳоланмайди. Одатда, резидентларга бундай чекловлар қўйилмайди. Масалан, Германия терма жамоаси Туркияни ўз майдонида қабул қилганида, немис фуқаролигига эга ёки бу ерда қонуний яшаш ҳуқуқини олган туркларнинг ҳам бемалол мезбонлар учун ажратилган секторларда ўйинни томоша қилиб турганини кўп кузатганмиз. БААнинг айни пайтдаги талаби умумий принципларига зид ва дискриминация сифатида ҳам баҳоланиши мумкин.

Афтидан БАА мутасаддилари стадионда мухлислар тўқнашуви ёки тартибсизлик келиб чиқишидан кўра, меҳмон мухлислар сони кўпайиб кетиб, трибунада устунликка эришиш эҳтимолидан қўрқаётгандек гўё.

Маълумот учун, А гуруҳидаги қолган ўйинлар қуйидагича: 5 июн куни БАА Ўзбекистонни, Қатар Эронни, Шимолий Корея эса Қирғизистон терма жамоасини ўз уйида қабул қилади. 10 июн куни эса Ўзбекистон Қатар билан, Қирғизистон БАА билан, Эрон Шимолий Корея билан ўз майдонида ўйнайди.