UzAuto Motors «Cobalt Midnight»нинг қиммат нархда сотилаётганини рад этди

Расмий нархи 155,2 миллион сўм бўлган «Cobalt Midnight» баъзи автосалонларда 167 миллион сўмдан сотила бошлагани ҳақида хабарлар тарқалди. Бунда кўпроқ пул тўлаганларга автомобилни навбатсиз олиш имконияти тақдим этилиши келтирилганди. «Ўзавтосаноат» ахборот хизмати ушбу хабарларни рад этди ва дилерлик марказлари автомобиллар нархини мустақил равишда белгилаш ҳуқуқига эга эмаслигини маълум қилди.

Фото: UzAuto Motors

Бир неча кун олдин Автострада нашри UzAuto Motors дилерлари Cobalt Midnight автомобилини заводдан расмий нарх – 155,2 млн сўмдан сотиб олиши, кейин эса бозорларда олибсотарлар билан рақобатлашиш учун сотув нархини мустақил равишда белгилаши, хусусан, 167 млн сўмдан сотиши мумкинлиги ҳақида хабар берганди. Шунингдек, автодилерларга қўшимча ҳақ тўланса, машинани навбатсиз олиш мумкинлиги ҳам келтирилганди.

«Ўзавтосаноат» ахборот хизматининг Kun.uz’га маълум қилишича, дилерлик марказлари автомобиллар нархини мустақил равишда белгилаш ҳуқуқига эга эмас. Барча сотувлар фақат компания томонидан белгиланган расмий нархлар асосида амалга оширилиши шарт.

«Компания дилерларнинг фаолиятини доимий мониторинг қилиб боради. Агар белгиланган расмий нархдан юқори баҳода сотиш ҳолатлари аниқланса, бундай ҳолатлар дилерлик шартномасини бузиш сифатида баҳоланади ва тегишли чоралар кўрилади.

Ҳозирги вақтда UzAuto Motors «Cobalt Midnight» АТ автомобили 167 миллион сўмдан сотилган ҳолатларни қайд этмаган», дейилади компания баёнотида.

#Cobalt #UzAuto Motors