Самарқандда машинасида шер боласини олиб юрган шахс аниқланди

Самарқанд туманида яшовчи фуқаро ноқонуний равишда шер боласини боқиб келгани аниқланди, деб хабар беради Экология, атроф-муҳитни муҳофаза қилиш ва иқлим ўзгариши вазирлиги.

Ижтимоий тармоқларда Самарқандда фуқаро ўз машинасида шер боласини олиб юргани тасвирланган видео тарқалди.

 

 

 

 

View this post on Instagram

 

 

 

 

 

 

 

 

 

 

 

A post shared by Ekologiya vazirligi | Министерство Экологии (@ecology_uzb)

Қайд этилишича, Самарқанд вилоят Экология бошқармаси, вилоят прокуратураси ва ИИБ ходимларидан иборат ишчи гуруҳ томонидан тезкор тартибда ҳолат юзасидан ўрганиш ишлари олиб борилган.

Ўрганиш натижасида Самарқанд туманида яшовчи фуқаро Африка шери боласини туманнинг Оқбўйро маҳалласи ҳудудидаги дала ҳовлиларнинг бирига яширишга урингани аниқланган. Шер боласи дала ҳовлининг сим тўсиғига боғлаб кетилган ҳолда топилган. Унга биринчи ёрдам кўрсатилиб, вақтинча сақлаш учун вилоят кинология марказига олиб келинган ҳамда алоҳида парваришга олиниб, тиббий кўрикдан ўтказилган.

Айни пайтда ушбу қонунбузарлик юзасидан тегишли ҳужжатлар расмийлаштирилиб, вилоят прокуратураси томонидан ҳолатга ҳуқуқий баҳо берилмоқда.