Исроил ҳарбийлари европалик дипломатлар томонга ўқ узди

21 май куни Исроил аскарлари Ғарб давлатларининг юқори мартабали дипломатлари, фаластинлик расмийлар ва журналистлар иштирок этаётган делегацияни тарқатиш мақсадида огоҳлантирувчи ўқ узди. Делегация Исроил томонидан босиб олинган Ғарбий Соҳилдаги шаҳар – Женинни айланиб чиқаётган эди. Бу ҳақда Фаластин маъмурияти ва ҳодиса жойидан олинган телевидение лавҳаларига таяниб, New York Times хабар бермоқда.

Ҳодиса натижасида ҳеч ким жароҳат олмаган, бироқ бу ҳолат Ғазо ва Ғарбий Соҳилда олиб борилаётган ҳаракатлар туфайли Исроил ва унинг халқаро ҳамкорлари ўртасидаги аллақачон таранглашган муносабатларни янада кучайтирди. Ўқ узиш воқеаси Буюк Британия, Франция ва Канада Исроилдан Ғазодаги урушни тўхтатишни талаб қилганидан икки кун, Британия эса Исроил билан савдо музокараларини тўхтатганидан бир кун ўтиб содир бўлди.

Ушбу уч давлат дипломатлари чоршанба куни Фаластин маъмурияти вакиллари билан бирга Женин шаҳрини кўздан кечираётган катта дипломатик делегация таркибида бўлган. Фаластин маъмурияти бу ташрифни Исроил ҳарбийлари томонидан қуролли гуруҳларга қарши амалиётлар баҳонасида шаҳарнинг бир четидаги ҳудуд эгаллаб олиниб, қисман вайрон қилинганини кўрсатиш учун ташкил қилган эди.

Бу ҳудуд «Женин қочқинлар лагери» деб аталади. Бу ерда, асосан, 1948 йил атрофидаги урушларда ўз уйларидан қувиб чиқарилган фаластинликларнинг авлодлари яшайди. Видеога кўра, ташрифнинг охирида, делегация аъзолари аскарлардан тахминан 70 метр масофада турган бир пайтда, Исроил аскарлари камида етти маротаба огоҳлантирувчи ўқ узган. Видеоларда кўрсатилишича, ўқ узиш журналистлар билан интервьюлар ўтказилаётган, баъзи расмийлар эса аскарларга орқа қилиб турган пайтда бошланган. Ўқ овозидан сўнг делегация тезда орқага чекиниб, баъзилар ён кўчага яширинди.

Бу жой, 2022 йил май ойида Исроил аскари томонидан фаластинлик журналист Ширин Абу Акла ўлдирилган ҳудудга яқин масофада жойлашган. Исроил ҳарбийларининг баёнотига кўра, огоҳлантирувчи ўқлар делегация «тасдиқланган йўналишдан четга чиққани ва рухсат этилмаган ҳудудга киргани» учун узилган. Ҳарбийлар бу ноқулайлик учун афсус билдирган ва ҳодиса ўрганилаётганини айтган.

Бироқ Женин мэри Муҳаммад Жаррор бу даъволарни рад этди:

«Ташриф йўналиши ҳафтанинг бошида Исроил томони билан келишилган эди. Провокация бўлмаган. Фақат дипломатлар ва журналистлар бор эди, ташриф режаси расмий таклифга илова қилинган».

Франция ташқи ишлар вазири Жан-Ноэл Барро Исроил ҳарбийларининг ҳаракатини «қабул қилиб бўлмас» деб атади ва воқеани тушунтириш учун Исроил элчисини чақиришини маълум қилди. Канада ташқи ишлар вазири Анита Ананд эса Исроилга жиддий хавотирлари етказилиши, тўлиқ тергов ва жавобгарлик кутишини айтган.

Европа Иттифоқининг бош дипломати Кая Каллас ҳам Исроилни отишма содир этган аскарлар учун жавобгарлик белгилашга чақирди: «Дипломатларнинг ҳаётига таҳдид – бу ҳеч қачон қабул қилинмайди», — деди у матбуот анжуманида.

Европа Иттифоқи вакиллари ушбу сафарда иштирок этган камида 20 та дипломатик миссия вакиллари орасида бўлган.