Европа Иттифоқи Сурияга қарши санкцияларини бекор қилади

Санкциялар Башар Асад даврида жорий этилган. Ўтган йил декабрда у ҳокимиятдан ағдарилгач, ғард давлатлари Сурияга қарши санкцияларини бекор қилишни бошлади.

Фото: AFP

Европа Иттифоқи Сурияга қарши жорий этилган санкцияларни бекор қилиш бўйича қарор қабул қилди. Бу ҳақда ЕИнинг ташқи ишлар ва хавфсизлик сиёсати бўйича олий вакили Кая Каллас маълум қилди.

«Охирги 14 йил давомида ЕИ доим сурияликларни қўллаб-қувватлаб келди ва бу ишни давом эттиради», — дейди Каллас.

Шу билан бирга, у санкцияларнинг барчаси дарҳол ечиладими ёки бу босқичма-босқича амалга ошириладими — аниқлик киритмади. Deutsche Welle ўзининг дипломатик манбасига таяниб ёзишича, Брюсселдагилар Дамашққа қарши санкцияларни «босқичма-босқич» ечиш ва юмшатишларни бекор қилиш имконияти сақланиб қолишни истаётгани ҳақида ёзди.

13 май куни АҚШ президенти Доналд Трамп ҳам Сурияга қарши санкцияларни бекор қилиш ниятида эканини маълум қилганди.

Ғарб давлатларининг Сурияга нисбатан санкциялари мамлакатни Башар Асад бошқарган даврда жорий этилган. 2024 йил декабрда у ҳокимиятдан ағдарилди ва Россияга қочиб кетди. Ҳокимият тепасига «Ҳайъат Таҳрир аш-Шом» келди. Улар Сурия демократик давлатга айлантирилишини ваъда қилди.

#Сурия #ЕИ #санкциялар