Жаҳон | 18:02 / 23.06.2025
2347
2 дақиқада ўқилади

Венгрия ва Словакия Россияга қарши санкцияларнинг 18-пакети қабул қилинишини блоклади

Чекловларнинг мазкур пакети қабул қилинганида ЕИ давлатларига, жумладан, Словакия ва Венгрияга ҳам Россиянинг арзон нефт хомашёсини харид қилиш тақиқланган бўларди.

Фото: Adrián Zoltán / 24.hu

Венгрия ва Словакия Европа Иттифоқига аъзо давлатлар ТИВ раҳбарларининг Брюсселда ўтказилган учрашувида Россияга нисбатан санкцияларнинг 18-пакети қабул қилинишига қарши чиқди. Бу ҳақда Венгрия ташқи ишлар вазири Петер Сийярто маълум қилди.

«Биз Словакия билан бирга санкцияларнинг 18-пакети қабул қилинишига тўсқинлик қилдик. Мазкур ҳолатда Европа Иттифоқи давлатларига, жумладан, Венгрия ва Словакияга ҳам Россия табиий гази ва арзон нефт хомашёсини харид қилиш тақиқланган бўларди», - дейди вазир.

Сийяртонинг сўзларига кўра Венгрия вакиллари, шунингдек, Украинага кўрсатиладиган молиявий ёки ҳарбий ёрдамни, шунингдек, ҳарбий операцияларни қўллаб-қувватлашга тайёр эмасликларини билдирган.

Европа комиссияси Россияга қарши санкцияларнинг 18-пакетини қабул қилишни июн бошларида таклиф қилганди. Чекловларнинг янги пакети Россиянинг «Шимолий оқим» газ қувурлари, аллақачон жорий этилган санкцияларни четлаб ўтиш билан шуғулланаётган банклар ва РФ ҳарбий саноатига қаратилган. Еврокомиссия, шунингдек, Россия нефти учун энг юқори нархни баррелли учун 60 доллардан 45 долларгача туширишни таклиф қилган.

Мавзуга оид

Эълонлар