Метронинг 9 та бекатида она-бола хонаси ва ҳожатхона қурилиши ваъда қилинганди. Бу амалга ошяптими?

Ўтган йили ноябр ойида номаълум эркак “Пахтакор” бекатида ҳожатини чиқаргани видеоси тарқалиб, кенг муҳокамаларга сабаб бўлгач, Тошкент метрополитени 9 та бекатда она-бола хонаси ва ҳожатхона қурилиши ва 1-босқич бошланганини эълон қилганди.

Kun.uz шу ишлар ижроси юзасидан Тошкент метрополитени матбуот хизмати билан боғланди. Таъкидланишича, 1-босқичда ҳозирча фақат “Буюк ипак йўли” бекатида шундай махсус хоналар ташкил қилинган.

“Амир Темур хиёбони” ва “Пахтакор” бекатида қурилишнинг якуний босқичи кетмоқда, “Беруний” метро бекатида эса монтаж ва демонтаж ишлари қолган.

“Қурилиш жараёнининг ўзи: ўрнатиш, керакли жиҳозлар билан таъминланиши – умуман ишларни амалга ошириш учун шароит ноқулай. Бу ер устида қилинадиган жамоат ҳожатхоналаридан фарқ қилади. Шунинг ҳисобига чўзилиши мумкин.

Ҳамма бекатимиз ҳар хил ер қатламида жойлашган, шунга қараб ҳаммасидаги қурилишга ҳар хил вақт кетади. Ҳозир бир вақтнинг ўзида “Пахтакор” билан “Амир Темур хиёбони” бекатларида қуриляпти, 90-95 фоиз иши битган. “Беруний”дагисида эса монтаж-демонтаж ишлари кетяпти”, – дейди корхона матбуот котиби Тўйчи Мирзаев.

Ҳозирча 1-босқич қачон якунланиб, махсус хоналар иш бошлаши, қолаверса, 2-босқич қурилиши қачондан старт олиши номаълум.

Эслатиб ўтамиз, 9 та бекатда қурилаётган ҳожатхоналар пулли бўлиб, унинг нархи тадбиркор томонидан белгиланиши маълум қилинган.

Махсус хоналар қуриладиган бекатлар қуйидагилар:

• “Буюк ипак йўли”;
• “Амир Темур хиёбони”;
• “Мустақиллик майдони”;
• “Пахтакор”;
• “Олмазор”;
• “Беруний”;
• “Чорсу”;
• “Дўстлик”;
• “Бодомзор”.