АҚШ Россияга қарши янги санкциялар бўйича ишларни якунлади

Вашингтон Россияга қарши янги иқтисодий санкцияларни, жумладан, банк ва энергетика чораларини ишлаб чиқишни якунлади, бу эса Москвани АҚШ президенти Доналд Трампнинг Россиянинг Украинадаги урушини ҳал қилиш бўйича саъй-ҳаракатларини қабул қилишга мажбурлашга қаратилган. Бу ҳақда 2 май, жума куни Reuters агентлиги уч нафар америкалик расмий ва бошқа манбага таяниб хабар берди.

Чекловлар Россиянинг энергетика компанияси "Газпром" ҳамда Россиянинг табиий ресурслари ва банк секторидаги йирик ўйинчиларни нишонга олиши мумкин, деди АҚШ маъмурияти расмийси.

Агентлик маълумотларига кўра, ҳозирги босқичда Оқ уйда АҚШ Миллий хавфсизлик кенгаши (МХК) даражасида тасдиқлаш ишлари олиб борилмоқда. Пакет Трамп томонидан имзоланиши керак. Бироқ, у бу чораларни маъқуллайдими ёки йўқми, ҳозирча аниқ эмас.

«Президент бошиданоқ тўлиқ ва кенг қамровли ўт очишни тўхтатишга эришиш бўйича ўз мажбуриятини аниқ айтди», деди МХК матбуот котиби Жеймс Хюитт. «Биз давом этаётган музокаралар тафсилотларига изоҳ бермаймиз», — дея қўшимча қилди у.