Модрич «Реал»ни тарк этади

Лука Модрич «Реал»дан кетишини эълон қилди. «Мадрид» тарихидаги энг совриндор футболчи 13 мавсумдан кейин, 40 ёш арафасида клубни тарк этади.

Модрич кетиши ҳақида таъсирли мактубида хабар қилди:

«Қадрли мадридлик мухлислар,

Вақт етиб келди. Бу — мен ҳеч қачон бўлишини хоҳламаган лаҳза, аммо футбол шундай. Ҳаётда ҳам ҳар бир нарсанинг боши ва охири бўлади. Шанба куни мен «Сантяго Бернабеу»даги сўнгги ўйинимни ўтказаман.

Мен 2012 йилда дунёнинг энг яхши жамоаси либосини кийиш орзуси ва катта ишлар қилишга бўлган иштиёқ билан бу ерга келган эдим. Лекин кейин нималар бўлишини тасаввур ҳам қила олмасдим.

«Реал»да ўйнаш менинг ҳаётимни футболчи сифатида ҳам, инсон сифатида ҳам ўзгартирди. Тарихдаги энг буюк клубнинг энг муваффақиятли даврларидан бирига гувоҳ ва иштирокчи бўлганимдан фахрланаман.

Юрагимдан, чин кўнглимдан клубга, айниқса президент Флорентино Пересга, жамоадошларимга, мураббийларга ва бу йиллар давомида менга ёрдам берган барчага ўз миннатдорлигимни билдираман.

Бу давр ичида мен ажойиб лаҳзаларни бошдан кечирдим. Имконсиздек туюлган камбэклар, финаллар, байрамлар ва «Бернабеу»даги сеҳрли кечалар... Биз ҳамма нарсани ютдик ва мен жуда хурсанд бўлдим. Жуда-жуда хурсанд...

Бироқ ғалабалар ва совринлардан ҳам муҳими — мен юрагимда барча «Реал»чиларнинг муҳаббатини олиб кетяпман. Сизлар билан мендаги алоҳида боғлиқликни қандай изоҳлашни ҳам билмайман.

Ўзимни қўллаб-қувватланган, ҳурмат қилинган ва севилган ҳис қилдим ва ҳали ҳам шундай ҳис қиламан. Менга кўрсатган ҳар бир олқиш ва меҳрни ҳеч қачон унутмайман.

Мен кетяпман, юрагим эса фахр, миннатдорлик ва унутилмас хотиралар билан тўла. Клублар ўртасидаги жаҳон чемпионатидан кейин майдонда бу либосни умуман кийа олмасам ҳам мен доим «Мадрид» мухлиси бўлиб қоламан.

Hala Madrid Y Nada Mas!».

«Реал» ҳам Модрич кетишини тасдиқлади: «„Реал Мадрид“ футбол клуби ва сардоримиз Лука Модрич АҚШда бўлиб ўтадиган Клублар ўртасидаги жаҳон чемпионатидан кейин унинг клубимиз футболчиси сифатидаги унутилмас даврини якунлашга келишиб олди.

„Реал Мадрид“ клубимиз ва жаҳон футболининг энг буюк афсоналаридан бири бўлган ушбу инсонга ўз миннатдорчилигини ва чуқур меҳрини изҳор этади».

Флорентино Пересдан иқтибос: «Лука Модрич „Реал Мадрид“нинг барча мухлислари қалбида доимо клубимиз қадриятларини ифода этган ноёб ва намунали футболчи сифатида абадий қолади. Унинг футболи „Мадрид“нинг ва бутун дунё бўйлаб футбол мухлисларини ўзига ром этган. Унинг мероси абадий яшайди».

«Реал» шанба куни «Реал Сосиедад»га қарши ўйинда Модрич билан хайрлашув маросими ўтказилишини анонс қилган.

Модричнинг «Реал»даги асосий ютуқлари

● 28 титул — Чемпионлар лигасидаги 6 ғалаба, 6 бор клублар ўртасидаги жаҳон чемпионатидаги ғолиблик, 5 бор Европа Суперкубоги, Ла Лигада 4 чемпионлик, Испания кубогидаги 2 титул ва Испания Суперкубогидаги 5 ғолиблик;

● 590 ўйин ва 43 гол. Аммо бу ҳали ҳаммаси эмас: олдинда «Соседад»га қарши хайрлашув учрашуви ҳамда клублар ўртасидаги жаҳон чемпионати ўйинлари бор;

● 2018 йилги «Олтин тўп»;

● 2028 йилда ФИФА томонидан The Best соврини билан тақдирланган;

● 6 марта Чемпионлар лигаси рамзий жамоасига кирган;

● 2 бор Ла Лиганинг энг яхши яримҳимоячиси деб топилган;

● 2017 йилда клублар ўртасидаги жаҳон чемпионатининг энг яхши футболчиси бўлган;

● Ва сон-саноқсиз заргарона узатмалар ва узоқ масофалардан урилган чиройли голлар билан 13 мавсум давомида мухлисларни хушнуд қилган.