Газ қуйиш шохобчаларида метан нархи 5200 сўмгача қимматлашди

1 майдан бошлаб газ қуйиш шохобчалари учун табиий газ нархи 1 куб метр учун 1800 сўмдан 2500 сўмгача (+38,9 фоиз) оширилди. Натижада метан нархи истеъмолчилар учун 5200 сўмгача кўтарилган. Шунингдек, биржа савдоларида пропан нархи ҳам охирги 10 кунликда қарийб 15 фоизга қимматлашган.

Ижтимоий тармоқларда тарқалган маълумотларга кўра, Ўзбекистондаги газ тўлдириш шохобчаларида метан нархи 1 куб метр учун 5200 сўмгача ошган.

Бунга 1 майдан бошлаб электр энергияси ва табиий газ учун янги тарифлар жорий қилингани асосий сабаб сифатида келтириляпти. Газ қуйиш шохобчалари учун табиий газ нархи 1 куб метр учун 1800 сўмдан 2500 сўмгача (+38,9 фоиз) оширилган.

Эслатиб ўтамиз, аввалроқ, президент ҳукуматга газ ва электр энергияси тарифлари ўзгаришини бир ойга кечиктириш бўйича топшириқ берганди. Нархлар режалаштирилганидек 1 апрелдан эмас, балки 1 майдан ошди. Қарор аҳоли ва бизнесни қўллаб-қувватлаш мақсадида қабул қилингани айтилганди.

Маълумот учун, 2023 йил сентябрда қабул қилинган ҳукумат қарорида 6 ой давомида автомобилларга газ тўлдириш шохобчаларида метан газ нархи 3250 сўмдан ошиб кетмаслиги белгиланганди. Ушбу давр тугаши муносабати билан 2024 йил 1 апрелдан бир куб метр учун максимал нарх 3250 сўмдан 3350 сўмгача оширилиб, имтиёзли давр яна икки ойга узайтирилди. 1 июндан эса энг баланд нархи 3750 сўм этиб белгиланиб, унинг амал қилиш муддати 31 июлгача ўзгартирилди.

Бугунги кунгача метан республиканинг турли ҳудудларида 3950 сўмдан 4250 сўмгача бўлган нархларда сотиб келинаётганди.

Сўнгги кунларда пропан нархларида ҳам сезиларли ошиш кузатиляпти. Хусусан, биржа савдоларида 18 апрел ҳолатига пропаннинг 1 тоннаси 5 млн 244 минг сўмдан сотилган бўлса, бу 29 апрелга келиб 6 млн 14 минг сўмгача ёки 14,7 фоизга қимматлашган.

#газ #метан