Санкт-Петербург яқинида мазут ортилган танкер чўка бошлади

Ленинград вилоятидаги Уст-Луга портида 130 минг тонна мазут юкланган Koala номли танкер чўка бошлади. Бу ҳақда Baza хабар берди.

«9 февралга ўтар кечаси Koala танкери (Антигуа ва Барбуда байроғи остида сузади) Уст-Лугадаги денгиз портида эди. Танкер бортида 24 кишидан иборат экипаж бўлган», дейилади хабарда.

Манбаларга кўра, ҳодисага кемадаги портлаш сабаб бўлган. 9 февралга ўтар кечаси кемага мазут ортилган ва у жўнаб кетишга тайёрланаётган эди. Тахминларга кўра, портлаш шундан кейин содир бўлган. Экипаж тез орада қирғоққа чиқиб олган, аммо танкерга сув кириб, чўка бошлаган.

Маълумки, танкер экипажи 24 кишидан иборат бўлиб, улар Россия,Гуржистон ва Индонезия фуқаролари.

Порт Санкт-Петербург шаҳридан 165 км узоқликда жойлашган. Ҳозирча танкердан мазут оқиб чиққани ҳақида маълумотлар йўқ.