Surxondaryoda kuzatilgan sel kichik talafot keltirdi

Boysun tumanida sel va suv toshqinlari kuzatildi. Bu haqda O‘zgidromet ma’lumot berdi.

Ma’lum qilinishicha, 9 aprel kuni soat 21:50 da tumanning Inkobod va Omonxona mahallasi hududida sel kelgan. Suv sarfi taxminan 10-15 metr kubga yetgan. Yog‘ingarchilik miqdori 0,5 mm bo‘lgan.

Suv o‘tkazgichlarga xas-xashaklar tiqilishi oqibatida toshib chiqqan sel suvlari ichki yo‘llarga hamda “Omonxona” masjidi hovlisiga oqib kirgan. Shuningdek “Darband-Boysun-Elbayon” 4R-105 avtomobil yo‘li qirg‘oqlariga toshib chiqqan.

Tumanning Munchoq qishlog‘ida kuzatilgan sel hodisasida esa suv sarfi taxminan 80-90 metr kubni tashkil qilgan. Sel chaqmoq va jala ko‘rinishidagi yomg‘irdan so‘ng kelgan. Suv toshishi oqibatida qishloq ichki yo‘llarida yo‘lning yuvilib ketishi kuzatilgan. Yomg‘ir suvlari qishloqdagi 1 ta xonadon tomorqasiga kirgan.

O‘zgidromet 8–9 aprel kunlari kutilayotgan kuchli yog‘ingarchilik sabab 8 ta viloyatda sel xavfi yuzaga kelishi mumkinligidan ogohlantirgandi.