Сурхондарёда кузатилган сел кичик талафот келтирди

Бойсун туманида сел ва сув тошқинлари кузатилди. Бу ҳақда Ўзгидромет маълумот берди.

Маълум қилинишича, 9 апрел куни соат 21:50 да туманнинг Инкобод ва Омонхона маҳалласи ҳудудида сел келган. Сув сарфи тахминан 10-15 метр кубга етган. Ёғингарчилик миқдори 0,5 мм бўлган.

Сув ўтказгичларга хас-хашаклар тиқилиши оқибатида тошиб чиққан сел сувлари ички йўлларга ҳамда “Омонхона” масжиди ҳовлисига оқиб кирган. Шунингдек “Дарбанд-Бойсун-Элбаён” 4Р-105 автомобил йўли қирғоқларига тошиб чиққан.

Туманнинг Мунчоқ қишлоғида кузатилган сел ҳодисасида эса сув сарфи тахминан 80-90 метр кубни ташкил қилган. Сел чақмоқ ва жала кўринишидаги ёмғирдан сўнг келган. Сув тошиши оқибатида қишлоқ ички йўлларида йўлнинг ювилиб кетиши кузатилган. Ёмғир сувлари қишлоқдаги 1 та хонадон томорқасига кирган.

Ўзгидромет 8–9 апрел кунлари кутилаётган кучли ёғингарчилик сабаб 8 та вилоятда сел хавфи юзага келиши мумкинлигидан огоҳлантирганди.