Шри-Ланкада автобус жарликка қулаши оқибатида 21 киши ҳалок бўлди

Шунингдек, яна 35 киши жароҳат олган бўлиб, улар шифохоналарга етказилган.

Фото: AP

Шри-Ланкада автобус жарликка тушиб кетиши оқибатида 21 киши ҳалок бўлди. Бу ҳақда полицияга таяниб маҳаллий Adaderana портал хабар берди.

Қайд этилишича, ҳодиса оқибатида камида 35 киши жароҳат олган. Улар Нувара-Элия ва Котмаледаги шифохоналарга етказилган.

ЙТҲда ҳалок бўлганлар шахси ҳозирча аниқланмаган.

Йўл-транспорт ҳодисаси Шри-Ланканинг Марказий провинциясидаги Котмале ҳудудида содир бўлган. Мамлакат Транспорт кенгашига тегишли автобус жанубий Катарагама зиёратгоҳидан Курунегалага кетаётганида йўлдан чиқиб, қарийб 100 метр баландликдан қулаб тушган.

Аввалроқ Шри-Ланкадаги Мадуру Оя сув омборига Bell 212 вертолёти қулаб тушган эди. Мамлакат Ҳарбий-ҳаво кучлари (ҲҲК) вакилининг сўзларига кўра, ҳаво кемаси фуқаролик уруши тугаганига бағишлаб ўтказиладиган ҳарбий парадга тайёргарлик доирасида синов парвозини амалга ошираётган бўлган.

#автобус #Шри-Ланка