Британия, Франция, Германия ва Полша раҳбарлари 10 май куни Киевга келади

Украинанинг Европадаги иттифоқдошларининг тўрт етакчиси – Франция президенти Эммануэл Макрон, Германия канцлери Фридрих Мерц, Буюк Британия бош вазири Кир Стармер ва Полша бош вазири Доналд Туск 10 май, шанба куни Киевга ташриф буюради.

Фото: AP

Улар Украина президенти Володимир Зеленский билан музокаралар ўтказишни ва Россияни 30 кунлик отишмани тўхтатишга рози бўлишга чақиришни режалаштирмоқда.

Ташриф ҳақида эълон қилар экан, Макрон тўртликнинг қўшма фотосуратини эълон қилди ва уни француз, инглиз, немис ва поляк тилларида: «Биз Киевга кетяпмиз. Украина учун, Европа учун» ёзуви билан чоп этди.

AFP агентлигининг таъкидлашича, тўрт Европа етакчисининг Украинага бир вақтнинг ўзида келиши мисли кўрилмаган ҳодиса.

Ташриф арафасида Киевнинг Европадаги иттифоқчилари раҳбарлари Москвани «30 кунлик тўлиқ ва сўзсиз ўт очишни тўхтатишга» чақирди. 8 май куни АҚШ президенти Доналд Трамп Зеленский билан суҳбатдан сўнг АҚШ Россиядан 30 кунлик ўт очишни тўхтатишга рози бўлишини талаб қилишини маълум қилди.

Бир кун аввал Reuters агентлиги дипломатик манбага таяниб, АҚШ ва Европадаги иттифоқчилар Москвага Украинада 30 кунлик ўт очишни тўхтатиш бўйича таклифни якунлашаётгани, агар Россия рад этса, Европа Иттифоқи ва АҚШ томонидан янги санкцияларга дучор бўлиши ҳақида хабар берган эди.

#Германия #Франция #Британия