АҚШ Конгресси Вакиллар палатаси спикери 11-уринишда ҳам сайланмади

Янги антирекорд: 164 йил ичида биринчи марта АҚШ Конгрессининг қуйи палатаси 11 турдан бери спикерни танлай олмаяпти.

Кевин Маккарти / Фото: Reuters

Республикачилар партияси етакчиси Кевин Маккарти кетма-кет 11 марта АҚШ Конгресси Вакиллар палатаси спикери лавозимига сайлана олмади, деб хабар бермоқда 6 январь, жума куни Reuters. Сайловнинг учинчи куни яна муваффақиятсиз якунланди ва конгрессменлар овоз беришни бошқа кунга қолдирди. Америка сиёсатида шунга ўхшаш вазият 1859 йилдан бери содир бўлмаган, ўшанда спикерни сайлаш учун 44 раунд овоз бериш талаб этилган, деб эслайди CNN. Аввалги антирекорд - тўққизта уриниш 1923 йилда ўрнатилган.

11-раунд якунларига кўра, Маккарти аввалги 10 та ҳолатда бўлганидек, керакли 218 та овозни тўплай олмади. 200 депутат уни ёқлаб овоз берди. Яна бир бор, Кевин Маккарти томонидан таклиф қилинган имтиёзларга қарамай, ўзгармаган «муросасиз консерваторларнинг кичик, аммо қатъий контингенти» позицияси тўсиқ бўлди.

Республикачиларнинг яна бир вакили Байрон Доналдс яна 20 та овоз олди – унинг номзодини Маккартини қўллаб-қувватлашдан бош тортган партия аъзолари кўрсатди. Бундан ташқари, АҚШнинг собиқ президенти Доналд Трамп битта овоз олди – расмий равишда Вакиллар палатаси аъзоларидан бошқаларга ҳам овоз беришга рухсат этилади.

Республикачилар партиясининг рақиби демократ Ҳаким Жеффрис аввалги кунлардаги каби 212 та овоз тўплади. 11-тур бошланишидан олдин у журналистларга партияси республикачиларга ёрдам беришни режалаштирмагани ва бирдамликни сақлашда давом этишини айтди. Кевин Маккартининг ўзи ҳам номзодини қайтариб олмоқчи эмас, деб таъкидлайди CNN. Шу билан бирга, Республикачилар партиясидаги канал манбаси Маккарти рақибларга таклиф қилган имтиёзлар сони туфайли марказчилар ўртасида «ўсиб бораётган умидсизлик» ҳақида гапирди.

Янги чақириқдаги Конгресс 3 январь куни ўз ишини бошлади. 2022 йил ноябрь ойида бўлиб ўтган оралиқ сайловлардан сўнг республикачилар Вакиллар палатасини назорат қила бошладилар ва ундаги 435 ўриндан 222 тасини эгаллаб олдилар.

Режага кўра, қуйи палатанинг янги спикери биринчи куни сайланиши керак эди, бироқ овоз бериш жараёнларидан кейин ҳам бу амалга ошмади. Бундан аввал демократлар вакили бўлган Нэнси Пелоси АҚШ Конгресси Вакиллар палатаси спикери лавозимини эгаллаб келган.

#АҚШ #Конгресс