АҚШ собиқ давлат котиби Райс Трампнинг Россияга ултиматумини қўллаб-қувватлади

АҚШ собиқ давлат котиби Кондолиза Райс Колорадо штати Аспен шаҳрида бўлиб ўтган хавфсизлик форумида АҚШ президенти Доналд Трампнинг Украинадаги жанговар ҳаракатларни тўхтатиш бўйича Россияга қўйган ултиматуми урушдаги «бурилиш нуқтаси» эканлигини айтди.

«Ўйлайманки, Украина халқига етказа оладиган энг яхши янгилик шуки, АҚШ ва Европа ниҳоят Владимир Путинни сўз билан тўхтатиб бўлмайди деган консенсусга келди. Агар унинг ўзи бошқа борадиган жойи йўқлигини, энди ғалаба қозона олмаслигини тушунсагина уни тўхтатиш мумкин», деди у форумдаги муҳокамаларидан бирида.

14 июл куни АҚШ президенти Доналд Трамп Россиядан Украинада 50 кун ичида тинчлик битими тузишни талаб қилди. Акс ҳолда, у 100 фоиз даражасида Россиянинг савдо ҳамкорларига қарши иккиламчи тарифлар билан таҳдид қилди.

Трампнинг сўзларига кўра, Украинадаги урушни тугатиш бўйича музокараларда, жумладан, у билан Россия президенти Владимир Путин ўртасида ҳамон «доимий музокаралар» давом этмоқда. «Ва кейин ракеталар Киевга учиб, одамларни ўлдиряпти», деди Оқ уй раҳбари ва «буни тўхтатиш керак»лигини таъкидлади. У «Путиндан ҳафсаласи пир бўлганини» қўшимча қилди, чунки у билан бир неча ой олдин келишувга эришмоқчи бўлган.