Hindiston va Pokiston AQSh vositachiligida o‘t ochishni to‘xtatishga kelishdi

«Amerika Qo‘shma Shtatlari vositachiligida olib borilgan uzoq davom etgan muzokaralardan so‘ng, Hindiston va Pokiston to‘liq va darhol kuchga kiruvchi otashkesimga rozi bo‘lganini mamnuniyat bilan e’lon qilaman», deb yozdi AQSh prezidenti 10 may kuni ijtimoiy tarmoqdagi sahifasida.

Tramp ikkala davlatni ham «sog‘lom fikr va yuksak aql bilan harakat qilgani» uchun tabrikladi.

Bu bayonotdan keyin Pokiston bosh vaziri o‘rinbosari – tashqi ishlar vaziri Is’hoq Dar ham darhol kuchga kiruvchi otashkesimni tasdiqladi.

«Pokiston va Hindiston darhol kuchga kiruvchi otashkesimga rozi bo‘ldi. Pokiston har doim mintaqada tinchlik va xavfsizlik uchun intilib kelgan, bu yo‘lda o‘z suvereniteti va hududiy yaxlitligi borasida hech qachon murosa qilmagan!» deb yozgan Dar.

Hindiston tashqi ishlar vaziri Subrahmanyam Jaishankar ham otashkesimni tasdiqladi.

«Bugun Hindiston va Pokiston o‘q uzish va harbiy harakatlarni to‘xtatish bo‘yicha o‘zaro kelishuvga erishdi. Hindiston doimo terrorizmning barcha shakl va ko‘rinishlariga nisbatan qat’iy va murosasiz pozitsiyani saqlab kelgan. Bu yo‘ldan bundan keyin ham chekinmaydi», deb yozgan Hindiston bosh diplomati.

Eslatib o‘tamiz, 6 may kuni kechqurun Hindiston «Sindur» harbiy operatsiyasi o‘tkazilishini e’lon qildi, uning doirasida mamlakat qurolli kuchlari Pokistondagi «terrorchilik infratuzilmalari»ga, shuningdek, Hindiston, Pokiston va Xitoy o‘rtasida bo‘lib olingan bahsli hudud – Kashmirning Pokiston hududidagi qismiga raketa zarbalari yo‘lladi. Bunga avvalroq Kashmirda ro‘y bergan terakt sabab qilib ko‘rsatildi.

Hindiston hujumiga javoban Pokiston harbiy-havo kuchlari va armiyasi Hindiston hududiga «ham havodan, ham yerdan» zarbalar berdi.

So‘ngi kunlarda vaziyat yanada keskinlashgan, xususan, kecha tunda Pokiston tomoni «Banyan-ul-Marsus» («Mustahkam devor») deb nomlangan keng ko‘lamli harbiy operatsiya boshlaganini bildirgandi.