Kanada Rossiyaning ulkan «Ruslan» samolyotini musodara qiladi

Kanada Rossiyaning An-124 «Ruslan» yuk samolyotiga bo‘lgan huquqni o‘zlashtirish va uni Ukrainaga topshirish ishi bo‘yicha oldinga siljidi, deb xabar berdi INsauga.

«Kanada bosh prokurori 2025 yil 18 mart kuni Ontario Oliy sudiga samolyotni musodara qilish to‘g‘risida ariza bilan murojaat qilib, jarayonni boshladi», deyiladi xabarda.

Eslatib o‘tamiz, 2022 yil fevral oyida Rossiyaning «Volga-Dnepr» yuk aviakompaniyasi An-124 samolyotida Xitoydan Torontoga COVID-19 testlarini yetkazib bergan edi.

Keyinchalik «Ruslan» Kanadani tark etishi kerak edi, biroq Rossiya Ukrainaga bostirib kirganidan keyin samolyot kanadaliklar tomonidan kiritilgan sanksiyalar tufayli hibsga olindi. Shundan beri samolyotga egalik qilish huquqi kanadaliklar va ruslar o‘rtasida davom etayotgan sud jarayoniga sabab bo‘lmoqda.

Bu vaqt davomida samolyot «Toronto Pirson» xalqaro aeroportining «diqqatga sazovor» obektiga aylandi.

2023 yil aprel oyida Kanada samolyotni Ukrainaga topshirish niyatida ekanligi ma’lum bo‘ldi. Ukraina bosh vaziri Denis Shmigal so‘zlariga ko‘ra, Kiyev An-124 samolyotini musodara qilishga allaqachon tayyorgarlik ko‘ra boshlagan.

An-124 - Antonov konstruktorlik byurosi tomonidan ishlab chiqilgan sovet transport samolyoti. U dunyodagi eng yirik yuk samolyotidir. «Ruslan» uzunligi 69 m, qanotlari uzunligi 73 m, yuk ko‘tarish quvvati 120 tonna, maksimal tezligi 865 km/soat.

Samolyot birinchi parvozini 1982 yil 24 dekabrda Kiyevda amalga oshirdi. Hammasi bo‘lib 56 ta mashina ishlab chiqildi.