Kolumbiya senati prezidentning mehnat islohoti to‘g‘risidagi qonun loyihasini blokladi

Kolumbiya senati prezident Gustavo Petro tomonidan taklif etilgan mehnat islohotiga oid qonun loyihasini blokladi. Sog‘liqni saqlash va mehnatga oid qonun loyihasi, jumladan, xodimlar maoshini oshirishni nazarda tutgan bo‘lib, u prezidentning saylovoldi kampaniyasi davomida e’lon qilgan ijtimoiy islohotlar dasturining bir qismi edi. Biroq u hokimiyatda ikki yarim yil bo‘lishiga qaramay, bu islohotlarni amalga oshira olmadi.

Reuters agentligining xabar berishicha, qonun loyihasi 14 senatordan iborat qo‘mitaning aksariyati unga qarshi ovoz berganidan so‘ng rad etilgan.

Senat qo‘mitasi yig‘ilishi bilan bir vaqtda Kolumbiyada prezident va uning islohotlarini qo‘llab-quvvatlovchi minglab odamlar ishtirokida namoyishlar bo‘lib o‘tgan. The City Paper Bogot nashrining yozishicha, faqat poytaxtning o‘zida 40 mingga yaqin odam ko‘chalarga chiqqan.

Kolumbiya yetakchisining o‘zi Bogota bosh maydonida o‘z tarafdorlari qarshisida 30 daqiqalik chiqish qilib, qonun chiqaruvchilar, biznes yetakchilari va Bogota meri Karlos Fernando Galanni keskin tandiq qilgan. Gustavo Petro hukumat mamlakatda plebissit (xalq ovoz berishining bir turi) o‘tkazishni talab qilishini va fuqarolarga sog‘liqni saqlash hamda mehnatga oid qonunlar bo‘yicha ovoz berish imkoniyati taqdim etilishini ta’kidladi.

Gustavo Petroning Kolumbiyada ijtimoiy ta’minot tizimi va mehnat qonunlarini qayta ko‘rib chiqish uchun urinishlari qonunchilik hamda sud organlari tomonidan bir necha bor bloklangan. Oxirgi marta mehnat islohoti to‘g‘risidagi qonun loyihasi senat qo‘mitasi tomonidan 2023 yilda rad etilgan. Petro islohotlarning to‘xtatilishida bir necha bor nufuzli biznes doiralarini ayblagan.