Ko‘changiz asfalt qilinmagan, ichimlik suvi va kanalizatsiya yo‘qmi? Bu haqda Telegram orqali xabar bering

O‘zbekistonda har bir ko‘cha kesimida ichimlik suvi, kanalizatsiya va yo‘llar qoplamasining holati bo‘yicha aniq ma’lumotlarni to‘plash maqsadida onlayn xatlovga start berildi.

Bu xatlov 10 mingta maktab, 7 mingta bolalar bog‘chalari, 3 800 ta tibbiyot muassasalari, 880 ta sport inshootlari va boshqa ijtimoiy obektlar infratuzilmasiga oid geoportalini yaratishda muhim ahamiyat kasb etadi.

Geoportal kelgusida davlat investitsiya dasturlarini ishlab chiqish uchun asos bo‘lib xizmat qiladi.

Geoportalni yaratish uchun avvaliga Bandlik vazirligi ko‘magida har bir mahalla bo‘yicha aholining ichimlik suvi, kanalizatsiya va yo‘llar qoplamasining sifati bo‘yicha birlamchi ma’lumotlar to‘plandi.

Joriy bosqichda esa so‘rovnoma orqali bu ma’lumotlarning haqqoniyligini tekshirish, aholi ishtirokida texnik xatolarni bartaraf etish maqsad qilingan.

So‘rovnoma @real_holat_bot Telegram-boti orqali, onlayn tarzda o‘tkaziladi. So‘rovnomada ishtirok etish uchun shaxsiy ma’lumotlarni kiritish shart emas, shaxsni tasdiqlash ham talab qilinmaydi.

So‘rovnoma 2025 yil 3–15 mart kunlari o‘tkazilib, unda har bir fuqaro ishtirok etishi mumkin. So‘rovnomada ishtirok etish vaqtida mahallaning joylashuvi, ko‘cha nomi, suv ta’minoti, kanalizatsiya va yo‘llar qoplamasi holatini ko‘rsatib o‘tish lozim.

Agar ko‘changizda maktab bo‘lsa, unda ichimlik suvi bor yoki yo‘qligini belgilang. Ma’lumotlarni to‘g‘ri va aniq kiritishni, so‘rovnomaning oxirigacha o‘tishni unutmang. So‘rovnomadan o‘tishga 2 daqiqa vaqt talab etiladi.

Ma’lumot uchun, ijtimoiy obektlar geoportali O‘zbekiston Respublikasi Prezidenti huzuridagi Strategik islohotlar agentligining “Delivery Unit” ofisi hamda Iqtisodiyot va moliya vazirligi tomonidan, “O‘zbekiston-2030” strategiyasi hamda “2025–2027 yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi prezident qarori doirasida shakllantirilmoqda.