Iqtisodiy jinoyatlarga qarshi kurashish departamentining vakolatlari aniqlashtirilmoqda

Prezident tomonidan «Iqtisodiy jinoyatlarga qarshi kurashish tizimi takomillashtirilishi munosabati bilan ayrim qonun hujjatlariga o‘zgartirish va qo‘shimchalar kiritish to‘g‘risida»gi qonun imzolandi.

Jinoyat-protsessual kodeksiga kiritilayotgan o‘zgartirishlarga muvofiq, bundan buyon Bosh prokuratura huzuridagi Iqtisodiy jinoyatlarga qarshi kurashish departamentining tergovchilari ham dastlabki tergovni amalga oshiradi.

Departament tergovchilari quyidagi jinoyatlar bilan bog‘liq ishlar bo‘yicha dastlabki tergovni amalga oshiradi:

• valuta qimmatliklarini qonunga xilof ravishda olish yoki o‘tkazish;
• to‘lovga soxta qobiliyatsizlik;
• to‘lovga qobiliyatsizlikni yashirish;
• qasddan to‘lovga qobiliyatsizlikka olib kelish;
• juda ko‘p miqdorda soliqlar yoki yig‘imlarni to‘lashdan bo‘yin tovlash;
• iste’molchilarning hayoti yoki sog‘lig‘i xavfsizligi talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish juda ko‘p miqdorda;
• bir guruh shaxslar tomonidan oldindan til biriktirib, takroran yoki xavfli retsidivist tomonidan yoxud badanga o‘rtacha og‘ir yoxud og‘ir shikast yetkazilishiga sabab bo‘lsa;
• etil spirti, alkogol va tamaki mahsulotlarining noqonuniy aylanishi yoki ishlab chiqarilishi.

Departamentning Davlat moliyaviy nazorati inspeksiyasi:

budjet to‘g‘risidagi qonunchilikka, budjet va smeta-shtat intizomiga rioya etilishi;
budjet tizimi budjetlarining xarajatlari ijrosi;
budjet tizimi budjetlarining mablag‘lari hisobidan to‘lovlarni amalga oshirishning navbatliligi, muddatlariga rioya etilishi va to‘liqligi;
budjet tizimi budjetlari mablag‘larining maqsadli sarflanishi;
rivojlanish davlat dasturlarini amalga oshirish uchun markazlashtirilgan manbalardan ajratiladigan mablag‘lardan maqsadli foydalanilishi;
O‘zbekistonning chet eldagi diplomatik muassasalari tomonidan chet el valutasidagi mablag‘lardan to‘g‘ri va maqsadli foydalanilishi;
pensiyalar va nafaqalar to‘g‘ri tayinlanishi, hisoblanishi va o‘z vaqtida to‘lanishi;
budjet subsidiyalari, ssudalari va kredit liniyalaridan maqsadli foydalanilishi;
O‘zbekiston tomonidan yoki uning kafolati ostida jalb qilingan kreditlardan (qarzlardan) maqsadli foydalanilishi;
insonparvarlik yordami va texnik ko‘maklashish mablag‘laridan maqsadli foydalanilishi;
davlat xaridlari bo‘yicha tender (tanlov) savdolarining to‘g‘ri o‘tkazilishi ustidan davlat moliyaviy nazoratini amalga oshiradi.